काठमाडौं । डियोगो डालोट र कोबी माइनुको गोलमा म्यानचेस्टर युनाइटेडले एफसीएसबीलाई २-० ले पराजित गर्दै युरोपा लिगको अन्तिम १६ मा स्थान पक्का गरेको छ । युनाइटेड अपराजित रहँदै युरोपा लिगको प्रिक्वार्टरफाइनल चरणमा प्रवेश गरेको हो ।
नेशनल एरिनामा दुवै टिमले पहिलो हाफ गोलरहित बराबरी खेलेका थिए । ६० औं मिनेटमा डालोटले गोल गर्दै प्रिमियर लिग टोलीलाई सुरूआती अग्रता दिलाएका थिए । उनले कोबी माइनुको पासमा गोल गरेका हुन् । त्यसको आठ मिनेटपछि माइनुले गोल गर्दै युनाइटेडको अग्रता दोब्बर पारे । अलेजान्ड्रो गार्नाचोले सेन्टरबाट उत्कृष्ट पास मिलाएपछि माइनुले गोल गरेका हुन् ।
जितसँगै युनाइटेड अपराजित रहँदै युरोपा लिगको अन्तिम १६ मा प्रवेश गरेको छ । उसले ८ खेलमा ५ जित सहित १८ अंक जोडेको छ । युनाइटेड तालिकाको तेस्रो स्थानमा छ । समान खेलमा ४ जित सहित १४ अंक जोडेको रोमानियाको एफसीएसबी ११ औं स्थानमा छ ।
