काठमाडौं । इङ्लिस प्रिमियर लिग टोली टोटनहम युरोपा लिगको प्रिक्वार्टरफाइनल चरणमा प्रवेश गरेको छ । गए राति सम्पन्न खेलमा एल्फस बोर्गमाथि ३-० को सहज जित हात पार्दै टोटनहम अन्तिम १६ मा प्रवेश गरेको हो ।
खेलाडीको चोटका कारण समस्याग्रस्त टोटनहमको जितमा किशोर खेलाडी मिकी मूरले कीर्तिमानी प्रदर्शन गरे । चोट र निलम्बनका कारण उसका १२ खेलाडी उपलब्ध थिएनन् । दुवै टिमले पहिलो हाफमा गोलरहित बराबरी खेलेका थिए । २० वर्षीया वैकल्पिक खेलाडी डेन स्कारलेटले ७० औं मिनेटमा गोल गर्दै घरेलु टोली टोटनहमलाई सुरूआती अग्रता दिलाए ।
८४ औं मिनेटमा १९ वर्षीया दामोला अजयीले गोल गरेपछि टोटनहमले अग्रता दोब्बर पार्यो । अजयी पनि वैकल्पिक खेलाडीको रूपमा मैदान प्रवेश गरेका थिए । अतिरिक्त सयमको चौथो मिनेटमा १७ वर्षीय विङ्गर मूरले गोल गरेपछि टोटनहम सहज जित सहित अन्तिम १६ मा प्रवेश गर्यो । १७ वर्ष १७२ दिनको उमेरमा गोल गरेका मूर प्रमुख पुरुष युरोपेली प्रतियोगितामा सबैभन्दा कान्छो इङ्लिस स्कोरर बने । टोटनहमका लागि यो उनको पहिलो गोल थियो । उनले जिमी ग्रिभ्सको रेकर्ड तोडेका हुन् ।
यस जितसँगै टोटनहमले ८ खेलमा ५ जित सहित १७ अंक जोडेको छ । ऊ लिगको चौथो स्थानमा छ । समान खेलमा १० अंक जोडेको एल्फस बोर्ग २६ औं स्थानमा छ ।
युनियन सेन्ट-गिलोइसलाई २-१ ले हराउँदै रेन्जस पनि सीधै अन्तिम १६ मा छनोट भएको छ ।
