काठमाडौं । युरोपेली च्याम्पियन्स लिग अन्तर्गत गए राति भएको खेलमा स्पेनिस क्लब बार्सिलोनाले शानदार पुनरागमन गरेको छ । बेन्फिकाको मैदानमा लगातार पछि परेको अवस्थाबाट बार्सिलोनाले ५-४ को पुनरागमन जित दर्ता गरेको हो ।
घरेलु मैदानमा पोर्चुगिज क्लब बेन्फिकाले दोस्रो मिनेटमा नै गोल गर्यो । बेन्फिकाको लागि भानगेलिस पवेल्डिसले अग्रता बनाएका थिए । यता रोबर्ट लेवान्डोस्कीले खेलको १३ औं मिनेटमा नै खेल बराबरी गरे । बार्सिलोनाले पेनाल्टीमा खेल बराबरी गरेको हो । यसैगरी, खेलको २२ औं मिनेटमा भानगेलिसले फेरि घरेलु टोलीको लागि गोल गरेपछि बार्सिलोना पछि परेको थियो । पहिलो हाफमा नै स्पेनिस पाहुना क्लब विरुद्ध भानगेलिसले ३० औं मिनेटमा ह्याट्रिक पूरा गरेपछि पहिलो हाफमा बेन्फिका ३-१ ले अघि रह्यो ।
तर दोस्रो हाफको खेल उस्तै रहेन । अट्याकिङ मिडफिल्डर राफिन्हाले ६४ औं मिनेटमा गोल गरेपछि बार्सिलोनाका समर्थकलाई केही राहत मिलेको थियो । यता, ६८ औं मिनेटमा हराउजोले आत्मघाती गोल गर्दा घरेलु टोली बेन्फिकाले ४-२ को अग्रता बनाउने अवसर पाएको थियो । खेलको ८५ मिनेटसम्म पनि बार्सिलोनाले अग्रता बनाउन सकेको थिएन ।
यसबीचको ७८ औं मिनेटमा बार्सिलोनाले दोस्रो पटक पनि पेनाल्टीको अवसर पाएको थियो । यो अवसर पनि लेवान्डोस्कीले गोलमा परिणत गरेका थिए ।
८६ औं मिनेटमा भने एरिका गार्सियाले गोल गर्दा खेल ४-४ को रोमाञ्चक बराबरीको अवस्थामा पुगेको थियो । अन्तिम मिनेटमा राफिन्हाले गोल गरेपछि बार्सिलोनाले च्यान्पियन्स लिगमा छैटौं जित दर्ता गरेको थियो । गए रातिको जितसँगै बार्सिलोनाले ७ खेलबाट १८ अंक जोडेको छ ।
बार्सिलोना अंक तालिकाको दोस्रो स्थानमा छ । पराजित बेन्फिका भने १० अंकका साथ १८ औं स्थानमा छ । च्याम्पियन्स लिगमै गए राति भएका अन्य खेलहरूमा भने स्लोभन ब्राटिसलाभाले स्टुटगार्टसँग ३-१ को हार बेहोरेको छ। यसैगरी, पीएसभीले क्रेभाना ज्वेदालाई ३-२ ले हराएको छ ।
