काठमाडौं । कान्तिपुर मिडिया ग्रुपका अध्यक्ष कैलाश सिरोहियाले सबै पक्षबाट हेर्दा गण्डकी प्रदेश अझै प्रभावशाली बन्ने बलियो सम्भावना देखिएको बताउनुभएको छ । कान्तिपुर मिडिया ग्रुपले बुधबार पोखरामा आयोजना गरेको ‘गन्तव्य गण्डकी’ विषयक अन्तर्क्रिया कार्यक्रममा सिरोहियाले यस्तो बताउनुभएको हो ।
“गण्डकी पर्यटकीय मात्रै नभई उत्पादनका दृष्टिले पनि पोखरा औद्योगिक शहर हो । शिक्षा र स्वास्थ्य क्षेत्रमा पोखरा अग्रणी बनेको छ भने मनाङ र मुस्ताङ जस्ता जिल्ला भौगोलिक रूपमा विकटसँगै पूर्वाधारमा कमजोर छन्”, उहाँले भन्नुभयो, “हिमाली क्षेत्रमा मनग्य सम्भावना भएको स्याउ लगायत खेतीले प्रोत्साहन र बजार पाउन सकेका छैनन् । सार्वजनिक–निजी साझेदारीहरूलाई संस्थागत बनाउन र पर्यटन, उद्यम तथा कृषिबाट आत्मनिर्भर अर्थतन्त्र निर्माण गर्न सरकारको योजना र निजी क्षेत्रको तत्परता अपरिहार्य छ ।”
उहाँले गण्डकी अझै प्रभावशाली बन्ने सम्भावना देखिए पनि त्यसका लागि केही काम गर्नुपर्ने देखिएको बताउनुभयो । पर्यटन र कृषि, शिक्षा र स्वास्थ्य, उद्यम र पूर्वाधारमा गण्डकीको सम्भावनाको उच्चतम प्रयोग गर्न अझै बाँकी भएको उहाँले बताउनुभयो । पूर्ण सम्भावनाको खोजी र उपयोग, नीति निर्माण र कार्यान्वयन, पूर्वाधार विकास र पर्यटन अभ्यास तथा लगानी र रोजगारी प्रवर्द्धनमा जोड दिन र एउटा साझा माध्यम भएर कान्तिपुर मिडिया ग्रुप ‘गन्तव्य गण्डकी’ लिएर आइपुगेको उहाँले बताउनुभयो ।
संघीयताको सन्दर्भमा उहाँले संघले प्रदेशका लागि बनाउनुपर्ने कानुन नबनाएर संघीयता सकसमै रहेको बताउनुभयो । “कतिपय कानुनका सन्दर्भमा प्रदेश अघिअघि, संघ पछिपछि पाउँछौं । मैले यहाँ भन्नैपर्छ गण्डकी प्रदेश सरकारले आमसञ्चार सम्बन्धी उदार कानुन बनाएर आफ्नो क्षमता समेत प्रदर्शन गरिसकेको छ । यस्ता अझै धेरै कानुन बनाउन बाँकी छ, त्यसको समेत आज यहाँ बहस होस भन्ने चाहन्छु”, उहाँले भन्नुभयो ।
उहाँले यो बहसले गण्डकी मात्रै नभई देशकै विकास र अर्थतन्त्रको विस्तारका अवरोध पन्छाउने उपायहरू पहिल्याउने पनि विश्वास व्यक्त गर्नुभयो । उहाँले सडक पूर्वाधार निर्माणमा जोडिएका हरेक सरोकारवाला निकायलाई थप विस्तारका लागि सडक भत्काउनुपरे भत्काइसकेपछि जतिसक्दो चाँडो निर्माण सम्पन्न गर्न पनि आग्रह गर्नुभयो । “यस शहरमा काठमाडौं, चितवन, भैरहवा जस्ता गन्तव्यबाट सहजै आवतजावत गर्न मिल्ने सडक पूर्वाधार बनाइदिनुहोस् । यहाँको अर्को प्रमुख मुद्दा अन्तर्राष्ट्रिय विमानस्थल सञ्चालन सम्बन्धी हो”, उहाँले भन्नुभयो, “गण्डकीको थप उन्नतिको मार्ग पर्यटन र त्यसमा पनि यहाँको अन्तर्राष्ट्रिय विमानस्थल तत्काल सञ्चालनसँग जोडिएको छ । झन्डै साढे २५ अर्ब रुपैयाँ लागतमा बनेको विमानस्थल सञ्चालनमा आएको दुई वर्षमा अन्तर्राष्ट्रिय उडान अझै सुरू हुन सकेको छैन ।”
