काठमाडौं । नेपाली पुरुष टिमले खो खो विश्वकपको अन्तिम चारमा आज इरान विरुद्ध प्रतिस्पर्धा गर्दै छ । खेल नेपाली समय अनुसार साँझ ६ बजेबाट सुरू हुनेछ ।
इन्दिरा गान्धी इन्डोर स्टेडियममा नेपाली टोली फाइनलमा स्थान बनाउने लक्ष्यमा हुनेछ । गए राति सम्पन्न खेलमा बंगलादेशलाई ६७-१८ अंकले पराजित गर्दै नेपाल सेमिफाइनलमा पुगेको थियो ।
नेपालले टस जितेर पहिले डिफेन्स गर्ने निर्णय लिएको थियो । टर्न एकमा पछि परेको नेपालले उत्कृष्ट पुनरागमन गरेको थियो । अट्याकमा बंगलादेशले आठ अंक जोड्यो । नेपालले पनि ड्रिम रनमा तीन अंक जोड्दै विपक्षीमाथि दबाब बनायो । त्यसपछि भने नेपालले उत्कृष्ट प्रदर्शन गर्यो ।
टर्न दुईमा अट्याक गरेको नेपालले ३१-८ को अग्रता लिएको थियो । टर्न तीनमा नेपालले बंगलादेशसँगको दूरी ३३-१८ मा पुर्यायो । अन्तिम तथा चौथो टर्नमा नेपालले ३४ अंक जोड्यो । बंगलादेश अंक थप गर्न असफल रहेपछि नेपाल ६७-१८ अंकका साथ अन्तिम चारमा प्रवेश गरेको हो । लिगको पहिलो खेलमा भारतसँग पराजित भएयता नेपालले हार बेहोरेको छैन ।
