काठमाडौं । इंग्लिस प्रिमियर लिग अन्तर्गत गए राति भएको खेलमा म्यानचेस्टर युनाइटेडले साउथह्याम्टनलाई हराएको छ । युनाइटेडले घरेलु मैदान ओल्ड ट्रार्फोड रंगशालामा साउथह्याम्टनलाई ३-१ ले हराएको हो । युनाइटेडको जितमा अमाद डियाल्लोले ह्याट्रिक गरेका थिए ।
खेलको २८ औं मिनेटमा आन्द्रे ओनानाले लगातार दुई सेभ गरेपछि साउथह्याम्टनको उत्कृष्ट प्रहार खेर गए । खेलको पहिलो हाफमा नाटकीय रूपमा साउथह्याम्टनले गोल कोशेली पायो । खेलको ४३ औं मिनेटमा म्यागुएल उगार्टाले आत्मघाती गोल गरेका थिए । यससँगै पहिलो हाफमा पछि परेको युनाइटेडले लामो समय गोल फर्काउन सकेन । पहिलो हाफमै गोल बेहोरेपछि युनाइटेड घरेलु मैदानमा लगातार चौथो हार नजिक पुगेको थियो । तर खेलको ८२ औं मिनेटमा डियालोले गोल गरेर उनले घरेलु टिमलाई ब्रेक थ्रु दिलाएका थिए । उनको पहिलो प्रहार गोलकिपरले बचाएपछि उनले रिबाउन्ड बलमा गोल गरेका हुन् ।
क्रिस्टयन एरिक्सनले मिलाइदिएको पासमा उनले दोस्रो गोल ९० औं मिनेटमा गरे । डियालो आफैंले मैदानको बीचमा रहेका एरिक्सनलाई दिएको पास फेरि आफैंले पाएपछि गोल गरेका हुन् । यो गोलसँगै युनाइटेडले खेलमा अग्रता बनाएको हो ।
खेलको इन्ज्युरी समयको चौथो मिनेटमा ह्याट्रिक पूरा गरेर डियालोले खेलमा सानदार फिनिस गरे । यो जितसँगै युनाइटेड घरेलु मैदानमा लगातार चौथो हारबाट जोगिएको छ । उसले अहिले २१ खेलबाट २६ अंक बनाएको छ । युनाइटेड १२ औं स्थानमा छ भने पराजित साउथह्याम्टन अंकतालिकाको पुछारमा छ । उसले समान २१ खेलबाट ६ अंक मात्रै बनाएको छ ।
