काठमाडौं । आर्सनलले प्रिमियर लिगमा क्रिस्टल प्यालेसमाथि शानदार जित हात पारेको छ । ग्याब्रियल जिससको दोहोरो गोलमा आर्सनलले ५-१ को जित हात पारेको हो।
यससँगै आर्सनलले वर्षको अन्तिम खेल पूरा गरेको छ भने यो सिजनमा प्रिमियर लिगमा लन्डन डर्बीमा अपराजित रहने टोली पनि बनेको छ ।
यसअघि प्रिमियर लिगमा चेल्सी सन् २००५ मा र आर्सनलले नै सन् २००४ मा अपराजित रहँदै वर्ष समाप्त गरेका थिए । आर्सनलले यो वर्ष ६ खेलमा पाँच गोल गरेको छ । एकै वर्षमा प्रिमियर लिग क्लबले गरेको यो सबैभन्दा राम्रो प्रदर्शन समेत हो । सेलहस्ट पार्कमा भएको खेलमा गए रातिको जित सहित आर्सनल अंकतालिकाको शीर्षस्थानमा पुगेको हो ।
गए रातिको गोल सहित ब्राजिली स्ट्राइकरले यो हप्तामै पाँच गोल पूरा गरेका छन् । उनले पछिल्लो खेलमा उनले काराबाओ कपमा ह्याट्रिक गरेका थिए। तर खेलको पहिलो हाफको अन्तिम समयमा बुकायो साका चोटग्रस्त हुँदै मैदानबाट बाहिरिएका थिए । यो चोटले आर्सनललाई गाह्रो पार्न सक्ने प्रशिक्षक आर्टेटाले बताएका छन् । जिससले पहिलो हाफको ६ र १४ औं मिनेटमा गोल गरे । उनको हेडर बारमा लागेर फर्किएपछि एकै हप्तामा दुई ह्याट्रिकको अवसर गुमाएका थिए । यद्यपि, उनले बनाएको अग्रतालाई काइ हभाट्सले ३८ औं मिनेटमा नै ३-१ को अवस्थामा पुर्याएका थिए ।
यता क्रिस्टलका इसमाइला सारले खेलको ११ औं मिनेटमा गोल फर्काएको भए पनि उसले थप गोल भने गर्न सकेन । यता ग्याब्रियल मार्टिनेलीले ६० र डेक्लान राइसले ८४ औं मिनेटमा गोल गरेपछि भने आर्सनलले पाँच गोल पूरा गरेको हो ।
