काठमाडौं । नेपाल प्रिमियर लिग (एनपीएल) को आजको दोस्रो खेलमा विराटनगर किंग्स र कर्णाली याक्स भिड्दै छन् । त्रिवि क्रिकेट मैदानमा हुने खेलमा टस जितेर विराटनगरले फिल्डिङ रोजेको छ ।
जारी एनपीएलमा कर्णाली याक्सले तीन खेल खेलेको छ । जसमा दुई वटामा पराजित हुँदा एक खेल जितेको छ । कर्णाली जनकपुर बोल्ट्ससँग आठ विकेटले र काठमान्डु गुर्खाजसँग तीन विकेटले पराजित भएको थियो । चितवन राइनोज विरुद्ध भने ६ विकेटले विजयी भएको थियो ।
यस्तै तीन खेल खेलेको विराटनगर किंग्सले पनि यसअघि दुई खेलमा हार भोग्दै एक खेल जितेको थियो । जनकपुर बोल्ट्स विरुद्ध आठ विकेट तथा सुदूरपश्चिम रोयल्स विरुद्ध ९० रनले पराजित भएको विराटनगरले लुम्बिनी लायन्सलाई भने दुई विकेटले हराएको थियो ।
यसअघि आजै भएको पहिलो खेलमा सुदूरपश्चिम रोयल्सले लुम्बिनी लायन्सलाई ४५ रनले हराएको छ । जारी प्रतियोगितामा लुम्बिनीको यो तेस्रो हार हो भने सुदूरपश्चिमको यो लगातार तेस्रो जित हो ।
