काठमाडौं । साउथह्याम्पटनसँग १-१ गोलको बराबरीमा रोकिए पनि ब्राइटन इङलिस प्रिमियर लिग तालिकाको दोस्रो स्थानमा उक्लिएको छ ।
घरेलु टोली ब्राइटनले सुरूआती अग्रता लिए पनि जोगाउन सकेन । २९औं मिनेटमा काउरो मिटोमाले कमजोर डिफेन्सको फाइदा उठाउँदै हेडर गोल गरेका थिए । मिटोमाले सन् २०२३ फेब्रुअरीयता पहिलो पटक ब्राइटनका लागि लगातार दोस्रो गोल गरेका हुन् । पहिलो हाफमा यही स्कोर नै कायम रह्यो ।
जित हात पारेको भए ब्राइटनले लिभरपूलसँगको दूरी ६ अंकमा झार्ने थियो । तर ५९औं मिनेटमा साउथह्याम्पटनका फ्लाइन डअनेसल गोल गर्दै खेल बराबरी गरेपछि ब्राइटनले एक अंकमा चित्त बुझायो । यसका बाबजुद दोस्रो स्थानमा रहेको ब्राइटनको १३ खेलबाट २३ अंक छ । शीर्ष स्थानको लिभरपूलको १२ खेलबाट ३१ अंक छ । साउथह्याम्पटन भने अन्तिम स्थानमा यथावत् छ । उसको १३ खेलबाट मात्र पाँच अंक छ ।
