काठमाडौं । चौंथो नेत्रहीन विश्वकपमा नेपाल लगातार दोस्रो खेलमा पराजित भएको छ । पाकिस्तानमा जारी विश्वकपमा आज नेपाल बंगलादेशसँग ६७ रनले पराजित भएको हो। बंगलादेशका आरिफ हुसेनले अर्धशतक प्रहार गरे ।
पहिले ब्याटिङ गरेको बंगलादेशले तीन बल बाँकी रहँदै सबै विकेट गुमाएर एक सय ७९ रन बनाएको थियो। उसलाई ठूलो स्कोरमा पुर्याउन ओपनर आरिफले ३१ बलमा ६ चौकाको सहयोगमा ५४ रनको बनाए । अर्का ओपनर मोहम्मद सलमानले ३४ रन जोडे। अबिद हसन राब्बीले २६ रनको योगदान दिए । नेपालका सुनिल मगर, भरत थापा, अमिष गुरागाईं र दुर्गादत्त पौडेलले समान एक/एक विकेट लिए ।
जवाफमा एक सय ८० रनको लक्ष्य पछ्याएको नेपालले निर्धारित २० ओभरमा एक सय १२ रन मात्र बनाउँन सक्यो । पदम बडाइला ११ र सुनिल तीन रनमा आउट भए। भरतले सर्वाधिक ३१ रन बनाउँदा नरेश चौधरीले १९ रनको योगदान दिए । रमेश बानियाँले १४ रन जोडे । बंगलादेशलका अस्मोत अलीले २ विकट लिए । मोहम्मद सलमान र आरिफ उल्लाहले एकएक विकेट आफ्नो नाममा गरे। हिजो भएको खेलमा नेपाल श्रीलंकासँग ७० रनले पराजित भएको थियो। नेपालले भोलि अफगानिस्तानको सामना गर्नेछ।
