ललितपुर । ललित स्मृति एन्फा यू-१८ लिगमा आज भएको खेलमा जावलाखेल युवा क्लबले सातदोबाटो युवा क्लबलाई ४-१ ले हराएको छ । एन्फा कम्प्लेक्समा सातदोबाटोमा जारी लिगमा लगातार दोस्रो जित दर्ता गर्ने क्रममा जावलाखेलका धर्वेन्द्र कुँवरले ह्याट्रिक गरेका थिए ।
पहिले हाफमा सातदोबाटोले एक गोलको अग्रता बनाए पनि त्यसलाई जोगाउन सकेन । सातदोबाटोका लागि निष्पक्ष बरालले ३८औं मिनेटमा गोल गरेपछि पहिलो हाफ १-० मा सकिएको थियो ।
दोस्रो हाफभरि जावलाखेलले बल पोसेसन बनाएर आक्रामक प्रदर्शन गर्यो । जावलाखेलका लागि धर्वेन्द्र कुँवरले ५०औं मिनेटमा बराबरी गोल फर्काएका थिए । त्यसैगरी, प्रशान्त तामाङले ५५औं मिनेटमा जावलाखेललाई अग्रता दिलाए । धर्वेन्द्रले खेलको ६९ र ८४औं मिनेटमा गोल गरेर दोस्रो हाफमा ह्याट्रिक पूरा गरेका थिए । आजको जितसँगै जावलाखेलले १० खेलबाट १४ अंक बनाएको छ । पराजित सातदोबाटोको ८ खेलबाट ४ अंक मात्र छ ।
