काठमाडौं । काठमाडौं गुर्खाजले आइकोनिक खेलाडीका रुपमा कृष कार्कीलाई अनुबन्ध गरेको छ । एनपीएल फ्रेन्चाइज क्लब काठमाडौंले उपत्यकाका विभिन्न ४ स्थानमा चार दिनसम्म 'ट्यालेन्ट हन्ट' आयोजना गरेर कार्कीलाई अनुबन्ध गरेको हो । 'ट्यालेन्ट हन्ट'मा उपस्थित करिब २ सय ५० खेलाडीलाई पछि पार्दै कृष टिममा अनुबन्धित हुन सफल भएका हुन् ।
ट्यालेन्ट हन्टबाट आइकोनिक खेलाडीका साथै थप केही खेलाडीले टिममा रहेर प्रशिक्षणमा सहभागी हुने मौका पाउछन् । काठमाडौंको ट्यालेन्ट हन्टमा ४ सय जनाले इच्छा देखाएको भए पनि २ सय ५० खेलाडी सहभागी बनेका थिए ।
अन्तिम छनोटमा काठमाडौंका ९, भक्तपुरका ४ र ललितपुरका १९ खेलाडी छानिएका थिए । ती खेलाडीबाट कृष छनोट हुन सफल भएका हुन् । काठमाडौंका प्रशिक्षक वसन्त शाहीले एनपीएल क्लबले आइकोनिक खेलाडीको रुपमा धेरै युवा खेलाडीलाई अवसर दिन लागेको बताए ।
हाल सबै टिमले ट्यालेन्ट हन्ट मार्फत खेलाडी छनोट गरिरहेका छन् । शनिबार बाट कर्णाली याक्सले सुर्खेतमा खेलाडी छनोट सुरु गरेको छ भने पोखराले खेलाडी छनोट गरिसकेको छ । पोखराले सुदीप अर्याललाई आइकोनिक खेलाडी छनोट गरेको हो । सुदूरपश्चिमले मंसिर २ गते धनगढीमा ट्यालेन्ट हन्ट गर्नेछ ।
