काठमाडौं । स्पेनका कार्लोस अल्काराज एटीपी फाइनल्सको समूह चरणबाट बाहिरिएका छन् ।
इटालीको ट्युरिनमा जर्मनीका अलेक्जेन्डर ज्वेरेभले अल्काराजलाई सोझो सेटमा पराजित गरेका हुन् । दुई पटकका एटीपी फाइनल्स च्याम्पियन ज्वेरेभले चार ग्रान्डस्लाम जितेका अल्काराजविरुद्ध उत्कृष्ट प्रदर्शन गरे । यसै वर्षको फ्रेन्च ओपनको फाइनलमा अल्काराजसँग पाँच सेटमा स्तब्ध भएयता ज्वेरेभ पहिलो पटक उनीविरुद्ध उत्रिएका हुन् ।
प्रतिस्पर्धात्मक बनेको पहिलो सेट ज्वेरेभले टाइब्रेकरमा ७-६ ले जिते । २१ वर्षीय अल्काराजलाई सेमिफाइनल पुग्नका लागि आफ्नो खेलमा जित हात पार्नु आवश्यक थियो । तर दोस्रो सेट ६-४ ले ज्वेरेभले जितेपछि अल्कराज अरुको नतिजा कुर्नु पर्ने अवस्थामा पुगेका थिए ।
ज्वेरेभले , यो खेल जित्न एक घन्टा ५७ मिनेट लगाएका थिए । यो जितपछि उनले दोस्रो स्थानमा रहँदै वर्षको अन्त्य गर्ने पनि पक्का भएको छ । अल्काराजले समुहका तीन मध्ये मात्र एकमा जित निकाले । कास्पर रुडले, आन्द्रे रुवलेभलाई तीन सेटमा पराजित गरेपछि अल्काराज आधिकारिक रुपमा प्रतियोगिताबाट बाहिरिएका थिए । रुडले , रुवलेभलाई ६-४, ५-७, ६-२ को सेटमा हराएका हुन् ।
अब रुडले नक आउट चरणमा घरेलु खेलाडी यानिक सिरनलसंग खेल्नेछन् ।
