काठमाडौं । साउदी प्रो लिगमा अल-हिलालले अल-ओख्दुदलाई हराउँदै लगातार ३१ खेलको विजयी कीर्तिमानी यात्रालाई निरन्तरता दिएको छ ।
अल-हिलालले अल-ओख्दुदलाई उसकै मैदानमा ३-० ले पराजित गरेको हो । साउदी स्ट्राइकर सालेह अल शेहरीले १६औं मिनेटमा गोल गर्दै अल-हिलाललाई अघि बढाए । दोस्रो हाफमा बार्सिलोनाका पूर्वफरवार्ड माल्कोमले गोल गर्दा अल-हिलाल २-० ले अघि रह्यो । साउदी विङ्गर सलेम अल दवासरीले ७३औं मिनेटमा गोल गर्दै अल- हिलाललाई सहज जित दिलाए ।
कीर्तिमानी जितसँगै अल-हिलालले लिगमा निकटतम प्रतिद्वन्द्वी अल-नासारसँगको दूरी १२ अंकमा पुर्याएको छ । अल-हिलालको २६ खेलमा ७४ अंक छ । अल-ओख्दुद भने २४ अंकसहित १५औं स्थानमा छ ।
