काठमाडौं । सहिद स्मारक ए डिभिजन लिगमा ८ पटकको च्याम्पियन मनाङ मर्स्याङदी र विभागीय टिम एपीएफ आमनेसामने हुँदैछन् । यो खेल साँझ साढे पाँच बजे त्रिपुरेश्वरस्थित दशरथ रंगशालामा हुनेछ ।
२०७५ सालपछि लिग उपाधि जित्न नसकेको मनाङ जारी लिगमा अपराजित छ। उसले आफ्ना अघिल्ला चार खेलमा दुई बराबरी र दुईमा जित हात पारेको छ ।
यता एपीएफले दुई खेल जित्दा एक बराबरी र एक हार व्यहोरेको छ । यी दुईबीच अघिल्लो वर्ष भएको भेटमा एपीएफले ३ - १ गोलको जित हात पारेको थियो । गत सिजन आहा रारा गोल्डकपको फाइनलमा एपीएफले मनाङलाई नै हराएर उपाधि उचालेको थियो ।
यस्तै रेलिगेसन ब्याटल गरिरहेका नेपाल पुलिस र न्युरोड टिम एनआरटीबीच दिउँसो साढे दुई बजे दशरथ रंगशालामै प्रतिस्पर्धा हुनेछ । जारी लिगमा पुलिसले अघिल्ला चारवटै खेल गुमाएको छ । तालिकाको पुच्छारमा रहेको पुलिसले खाता खोल्न सकेको छैन । रेलिगेसन जोनमै रहेको एनआरटीको मात्रै एक अंक छ । सोही समयमा च्यासल मैदानमा फ्रेन्ड्स र त्रिभुवन आर्मी आमनेसामने हुनेछन् ।