अछाम । ढकारी गाउँपालिका-६ मा एक सुत्केरी महिलाको उपचारका लागि लैजाँदै गर्दा उच्च रक्तश्राबका कारण बाटोमै मृत्यु भएको छ । गए राति सुत्केरी व्यथा लागेपछि अस्पताल लैजाने क्रममा २९ वर्षीया सरितादेवी जैशीको बाटोमै मृत्यु भएको प्रहरीले जनाएको छ ।
बाटोमै छोरा जन्माएकी सरितादेवीलाई स्वास्थ्यचौकी ढुङ्गाचाल्ना पुर्याइएको थियो, उच्च रक्तश्राब भएपछि थप उपचारका लागि उहाँलाई जिल्ला अस्पताल मंगलसेन पुर्याइएको थियो । मंगलसेन अस्पताल पुर्याउँदा उहाँको मृत्यु भइसकेको थियो ।
'बाटोमै बच्चा जन्माएकी सरितादेवीलाई समयमै अस्पताल ल्याइपुर्याएको भए बचाउन सकिने थियो,' जिल्ला अस्पताल अछामका निमित्त मेडिकल सुपरिटेन्डेन्ट डा. अधिराज आचार्यले भन्नुभयो, 'बच्चा जन्मिनेक्रममा उच्च रक्तश्राब भएको र ढिलो गरी अस्पताल ल्याएकाले उहाँको बाटोमै निधन भयो ।'
