धनगढी । दलित समुदायबाट संस्कृतमा आचार्य उत्तीर्ण हुनुभएका कृष्ण दमाईलाई धनगढी उपमहानगरपालिकाले सम्मान गरेको छ ।
जातीय छुवाछूतले जकडिएको सुदूरपश्चिमबाट आचार्य गर्न सफल दमाईलाई उपमहानगरपालिकाले नगद १ लाख ५१ हजार रुपैयाँसहित सम्मान गरेको हो ।
उहाँलाई बाजागाजासहित धनगढीमा स्वागत गरिएको थियो । सम्मान कार्यक्रममा नगर प्रमुख गोपाल हमालले संस्कृत विश्वविद्यालयबाट आचार्य गर्न सफल दमाईलाई इच्छुक भए उपहामगरपालिकामा जागिर दिने बताउनुभयो ।
कानुनी रुपमा छुवाछूत हटे पनि व्यावहारिक रुपमा यस क्षेत्रमा अझै जातीय विभेदले जरा गाडेर बसेको भन्दै हमालले यसको अन्त्यका लागि सबै जागरूक हुनुपर्नेमा जोड दिनु भयो ।
कञ्चनपुरको भीमदत्त नगरपालिका–३ का दमाईले दाङस्थित नेपाल संस्कृत विश्वविद्यालयबाट आचार्य उत्तीर्ण गर्नुभएको हो ।
