काठमाडौं । नेपाली कांग्रेसको केन्द्रीय कार्यसमिति बैठक सुरू भएको छ ।
केहीबेरअघि पार्टी केन्द्रीय कार्यालय सानेपामा बैठक सुरू भएको हो । बैठक मुख्यगरी चुनावी समिक्षा र पार्टीको १५औँ अधिवेशनमा केन्द्रित हुने नेताहरूले बताएका छन् । बैठकअघि सञ्चारकर्मीहरूसँग कुरा गर्दै केन्द्रीय सदस्य प्रतिमा गौतमले पार्टी अब १५औँ महाधिवेशनतर्फ केन्द्रित हुने बताउनु भयो ।
गौतमकाअनुसार मंगलबारको बैठकले १५औँ महाधिवेशनको प्रारम्भिक कार्यतालिका प्रस्ताव गर्नेछ । उहाँले आगामी भदौसम्म महाधिवेशन सम्पन्न गर्ने गरी छलफल अगाडि बढ्ने बताउनु भयो । पार्टीभित्रको आन्तरिक विवादलाई साम्य पार्दै पार्टीलाई एकढिक्का राख्ने प्रयास भइरहेको उहाँको भनाइ छ ।
उहाँले कतिपय नेताहरूले सभापतिकै हस्ताक्षरमा चुनाव लडेर आएको तथा अहिले उहाँलाई नै मान्दिनँ भन्ने गरेको भन्दै उनीहरूमाथि नैतिकताको प्रश्न खडा भएको समेत बताउनु भयो । उहाँले आगामी महाधिवेशनलाई एकताको अधिवेशन बनाउने र सबैलाई समेटेर अघि बढ्ने दाबी समेत गर्नुभयो ।
प्रतिनिधि सभा निर्वाचनपश्चात् सभापति गगनकुमार थापासमेत पहिलो पटक पार्टी बैठकमा सहभागी हुनुभएको छ । यसअघि उहाँले दिनुभएको राजीनामा पार्टीले अस्वीकृत गरिसकेको छ ।
