रूकुम पूर्व । नेपाली कम्युनिष्ट पार्टी (नेकपा)का संयोजक पुष्पकमल दाहालले रूकुमेली जनताको समृद्धिको आकाङ्क्षा पूरा गर्न आफू रूकुम पूर्वबाट उम्मेदवार बनेको बताउनुभएको छ ।
प्रेस सेन्टर नेपाल रूकुम पूर्वले बुधबार रूकुमकोटमा आयोजना गरेको पत्रकार सम्मेलनमा उहाँले जिल्लाको इतिहास, भूगोल, संस्कृति, जातजाति सबैको भावनामा आधारित विकासको ढाँचा अघि बढाउने प्रतिबद्धता व्यक्त गर्नुभयो । “जनयुद्धको आधार क्षेत्रको विकासलाई नयाँ ढङ्गले गति दिने मेरो सङ्कल्प छ । यहाँका जनताको भावना बुझेर जनताको अपेक्षा अनुसार यहाँबाट उम्मेदवारी दर्ता गराएको हुँ”, संयोजक दाहालले भन्नुभयो, “यहाँको भौतिक पूर्वाधारको विकास र विस्तार, शिक्षा, स्वास्थ्य, कृषि, रोजगारी सिर्जना र पर्यटन प्रवर्द्धनमा मेरो प्राथमिक विषय हुन् ।”
राजनीतिक रूपमा मात्रै नभइ विकासका दृष्टिकोणबाट पनि समाजवादको बीउ रूकुम पूर्वबाट रोप्ने उद्घोष गर्दै संयोजक दाहालले समाजवादी क्रान्तिको आधारइलाका रूकुम पूर्व बन्ने विश्वास व्यक्त गर्नुभयो । उहाँले बुधबारनै यहाँका शहीद परिवारसँग भेटघाट गर्नुका साथै स्थानीय जनसमुदायसँग अन्तक्रिया गर्नुभएको थियो ।
.png&w=350&height=150)
