काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले प्रजातन्त्र, बहुदलिय व्यवस्था र समावेशीतालाई जोगाएर नयाँ समझदारी गरेर अगाडि बढ्नुपर्ने बताउनुभएको छ ।
नेकपा एमालेको ११औँ महाधिवेशन उद्घाटन सत्रमा बौल्दै उहाँले तीन ठूला परिवर्तनका यी उपलब्धीहरूलाई जोगाएर राजनीतिक दल, पराम्परागत शक्ति र नवपुस्ताबीच समझदारी गर्नुको विकल्प नभएको बताउनुभएको हो ।
उहाँले २००७, २०४६ र २०६२/०६३ का उपलब्धीहरू प्रजातन्त्र, बहुदलिय व्यवस्था र समानुपातिक समावेशीतालाई सबैले स्वीकार गर्नुपर्ने बताउनु भयो । उहाँले सबै शक्तिबीचको समझदारीमार्फत नै देशलाई अगाडि बढाउन सकिने उल्लेख गर्नुभयो ।
हाल मृत अवस्थामा रहेको संविधानलाई ब्यूताएर मुलुकमा थप जोखिम निम्त्याउन नहुने उहाँको भनाइ छ । उहाँले निषेधको राजनीति, चरम भ्रष्टाचार, बेरोजगारी, संवैधानिक अंगहरूमा गरिएको दलियकरण लगायतका कारण भदौ २३ र २४ गतेको विद्रोह भएको बताउनुभयो ।
अब देशलाई सबैले जित्नेगरी अगाडि बढाउनुपर्नेमा जोड दिँदै उहाँले एमालेको महाधिवेशन नेतृत्व चयनमा मात्रै केन्द्रित हुन नहुने उल्लेख गर्नुभयो । उहाँले सबै राजनीतिक दलहरूलाई देश बनाउन एकजुट हुन आग्रह समेत गर्नुभयो ।
