काठमाडौं । नेपाली राष्ट्रिय पुरूष फुटबल टिमका कप्तान किरण चेम्जोङले सहिद स्मारक 'ए' डिभिजन लिग नहुँदाको प्रत्यक्ष असर खेलाडी उत्पादनमा परेको बताएका छन् ।
बंगलादेशविरूद्धको दुई मैत्रीपूर्ण खेलअघि शुक्रबार पत्रकार सम्मेलनमा बोल्दै गोलकिपर चेम्जोङले खेलाडी स्काउट गर्न नसकिएको र त्यसले राष्ट्रिय टिम कमजोर भएको प्रतिक्रिया दिएका हुन् ।
शीर्ष डिभिजनको लिग नभएको आज ८ सय १९ दिन पुरा भएको छ । लिग नहुँदा राष्ट्रिय टिममा स्तरीय खेलाडी आपूर्ति प्रभावित भएको किरणको भनाइ थियो । २०७९-८० को सिजनपछि लिग रोकिँदा अहिले कप्तान किरणसँगै ९ नेपाली खेलाडी बंगलादेशको शीर्ष डिभिजनको लिगमा अनुबन्धन भएका छन् ।
अखिल नेपाल फुटवल संघ एन्फाले २०८२ पुस ९ गतेदेखि होम एन्ड अवे लिग सुरू गर्ने प्रस्ताव राखेको छ । तर अन्तिम टुंगो भदौ ३१ गतेको कार्य समिति बैठकपछि मात्र लाग्ने बताइएको छ ।
यस्तै कप्तान किरणले एएफसी एसियन कप छनोटअन्तर्गतका खेल घरेलु मैदानमा खेल्न नपाउनु दु:खद भएको पनि उल्लेख गरे । उनले आफ्नै पुस्ताले नयाँ रंगशालामा खेल्ने विश्वास नरहेको बताए ।
फिफा विन्डोअन्तर्गतको अन्तर्राष्ट्रिय मैत्रीपूर्ण खेल घरेलु मैदानमा हुने भए पनि एएफसीले दशरथ रंगशालाई अयोग्य ठहर्याएको हो ।
