काठमाडौं । नेकपा एमाले सचिव योगेश भट्टराईले वर्तमान सरकारको कार्यकालभित्रै संविधान संशोधनको प्रस्ताव संसद्मा ल्याउने बताउनुभएको छ ।
काठमाडौंमा आइतबार आयोजित एक कार्यक्रमलाई सम्बोधन गर्दै उहाँले यस्तो बताउनुभएको हो । उहाँले निर्वाचन प्रणाली संविधान संशोधनसँग जोडिएको र सरकारले संविधान संशोधनको एजेण्डालाई प्राथमिकतामा राखेको बताउनु भयो ।
उहाँले संशोधन प्रस्ताव लैजाने बारेमा संसद्का सबै राजनीतिक दलसँग छलफल हुने पनि स्पष्ट पार्नुभयो । उहाँले संविधान संशोधनका लागि संसद्को दुई तिहाई बहुमत आवश्यक पर्ने भन्दै नेपाली कांग्रेस र एमालेको समर्थनले मात्रै संविधान संशोधन हुन नसक्ने बताउनु भयो ।
संविधान संशोधनका एजेण्डालाई नागरिकमा पनि लगेर छलफल गर्ने उहाँले बताउनु भयो । सकेसम्म सर्वसम्मत हुनेगरी संविधान संशोधनको प्रस्ताव लैजाने प्रतिबद्धता समेत उहाँले जनाउनु भयो ।
सचिव भट्टराईले राजनीतिक दलहरूको अडिट पनि महालेखाले गर्नुपर्ने प्रस्ताव गर्नुभयो ।
