काठमाडौं । प्रमुख प्रतिपक्षी नेकपा माओवादी केन्द्रको स्थायी समिति बैठक पार्टी कार्यालय पेरिसडाँडामा जारी छ ।
माओवादी केन्द्रको स्थायी समितिको बैठकमा पार्टीभित्र देखिएको विवाद व्यवस्थापनलगायत आगामी कार्यक्रमको एजेन्डालाई लिएर छलफल भइरहेको नेताहरूले बताएका छन् ।
यसअघि बुधबार बसेको पदाधिकारी बैठकले स्थायी समितिका लागि ९ वटा एजेन्डा तयार गरेको थियो । बैठकमा पार्टी अध्यक्ष पुष्पकमल दाहालले समसामयिक राजनीतिक घटनालाई लिएर अहिले धारणा राखिरहनुभएको छ ।
अध्यक्ष दाहालले आफ्ना धारणा राखेपछि नेताहरूले आ-आफ्ना धारणा राख्नेछन् । स्थायी समिति बैठकमा माओवादी केन्द्रका अध्यक्ष दाहालको कार्यशैलीलाई लिएर उपमहासचिव जनार्दन शर्माले उठाउँदै आउनुभएको विषयलगायत समाजवादी मोर्चाको आगामी कार्यक्रम, पार्टीले भदौदेखि सुरू गर्ने मध्यपहाडी राजमार्ग केन्द्रीत अभियानका विषयमा छलफल हुने एजेन्डा छ ।
त्यस्तै एकीकृत समाजवादीसँगको एकताको विषय पनि स्थायी समिति बैठकको एजेन्डा रहेको छ । त्यसैगरी संसदमा विचाराधिन रहेका महत्वपूर्ण विधेयकहरूको विषयमा पार्टी कसरी अघि बढ्ने भन्नेविषयमा पनि बैठकमा छलफल हुने माओवादी केन्द्रले जनाएको छ ।
स्थायी समितिको बैठकले तय गरेको एजेन्डामाथि केन्द्रीय कमिटीको बैठकमा छलफल हुनेछ । स्थायी समितिको बैठकले केन्द्रीय कमिटीको मिति तय गर्नेछ भने एजेन्डामाथि छलफल गरी आगामी कार्यक्रम सार्वजनिक गर्ने छ ।
