काठमाडौं । नेपाली कांग्रेसका सभापति शेरबहादुर देउवाले कांग्रेसबाट प्रतिनिधित्व गरी सरकारमा सहभागी भएका मन्त्रीहरूको कार्यप्रगति विवरणबारे जानकारी लिनुभएको छ । बिहीबार बिहान निजी निवास बूढानीलकण्ठमा बोलाएर सभापति देउवाले मन्त्रीहरूको कार्यप्रगति विवरणबारे जानकारी लिनुभएको हो ।
हालसम्म तीन जना मन्त्रीहरूले आफ्नो मन्त्रालयको कार्यप्रगतिबारे जानकारी दिएको युवा तथा खेलकुदमन्त्री तेजुलाल चौधरीले बताउनुभयो । उहाँले मन्त्रालयले सोचे अनुसारको काममा तीव्रता दिन नसकेको उल्लेख गर्नुभयो । छलफलमा मन्त्रालयको कार्यप्रगतिबारे जानकारी गराइएको र अब कसरी प्रभावकारी बनाउने भन्नेबारे नेताहरूले सुझाव दिनुभएको बताउनुभयो ।
उहाँले भन्नुभयो, “के राम्रा काम भए, कसरी प्रभावकारी बनाउने, कसरी अघि बढ्ने भन्ने विषयमा जानकारी दिने काम भइरहेको छ । अहिलेसम्म तीन वटा मन्त्रालयको विस्तृत जानकारी दिइएको छ । आफ्नो मन्त्रालयको ब्रिफिङ भइरहेको छ । उहाँहरूले सुझाव पनि दिनुभएको छ ।”
उहाँले अध्यादेशको बारेमा सकारात्मक छलफल भएको पनि बताउनुभयो ।
