काठमाडौं । प्रधानमन्त्री केपी शर्मा ओलीको आसन्न चीन भ्रमण स्वीकृत भएको छ । सिंहदरबारमा आज बसेको मन्त्रिपरिषद् बैठकले प्रधानमन्त्री ओलीको मंसिर १७ देखि २० गतेसम्म हुने चीनको औपचारिक भ्रमण स्वीकृत गरेको हो ।
प्रधानमन्त्री ओली मंसिर १७ गते बिहान चीनको बेइजिङ प्रस्थान गर्नुहुने तालिका छ । १८ गते महत्वपूर्ण राजनीतिक भेटवार्ता गर्नुहुनेछ । प्रधानमन्त्री ओलीले चीनका राष्ट्रपति सी चिनफिङ, प्रधानमन्त्री र चिनियाँ जन कंग्रेसका अध्यक्ष लगायत उच्चपदस्थहरुसँग भेटवार्ता गर्नुहुनेछ ।
१८ गते नै दुई देशबीच महत्वपूर्ण सम्झौतामा हस्ताक्षार समेत हुने कार्यक्रम छ । प्रधानमन्त्री ओली र चीनका राष्ट्रपति सीबीच एक्लाएक्कै भेटवार्ता गर्ने समेत कार्यतालिका रहेको परराष्ट्र मन्त्रालयले जनाएको छ ।
भ्रमणको तेस्रो दिन प्रधानमन्त्री ओलीले नेपाली र चीनियाँ व्यापारीको कार्यक्रमलाई सम्बोधन गर्नुहुनेछ । बेइजिङ विश्वविद्यालयको कार्यक्रमलाई समेत त्यही दिन सम्बोधन गर्ने कार्यक्रम छ । प्रधानमन्त्रीको भ्रमण टोलीमा सरकारी र निजी क्षेत्रका उद्योगी व्यवसायी समेत गरे झन्डै ९० जनाभन्दा बढी सहभागी हुनेछन् ।
