काठमाडौं । प्रतिपक्षी दल नेकपा एकीकृत समाजवादीका सम्मानित नेता एवं पूर्व प्रधानमन्त्री झलनाथ खनालले चीनको बीआरआई (बेल्ट एन्ड रोड इनिशिएटिभ) परियोजना अन्तर्गत लोन लिनै नहुने सत्तारुढ दल कांग्रेसको अडानप्रति आपत्ति जनाउनु भएको छ । सोमबार आफ्नो चीन भ्रमणबारे सुझाव लिन प्रधानमन्त्री केपी शर्मा ओलीले बोलाउनु भएको पूर्व प्रधानमन्त्री र पूर्व परराष्ट्रमन्त्रीहरूको छलफलपछि सञ्चारकर्मीमाझ उहाँले यस्तो प्रतिक्रिया जनाउनु भएको हो ।
नेता खनालले भूराजनीतिको नाममा बीआरआई परियोजना अन्तर्गत ऋण लिनुहुन्न भन्ने अडान पूर्वाग्रही भएकाले त्यस्तो सोचबाट प्रधानमन्त्री ओली प्रभावित हुन नहुने बताउनु भयो । उहाँले सो परियोजना विश्वका दुईतिहाइ मुलुकले स्वीकार गरिसकेको उल्लेख गर्दै नेपाल जस्तो सार्वभौम देशले पनि आफ्नो आवश्यकताको आधार अघि बढाउनुपर्ने सुझाव आफूले प्रधानमन्त्री ओलीलाई दिएको पनि बताउनु भयो ।
सो परियोजनालाई अघि बढाउने सन्दर्भमा सरकार कुनै पनि खालको आग्रह वा पूर्वाग्रहको पासोमा पर्न नहुने खनालको भनाइ थियो । उहाँले भन्नु भयो, “बीआरआई लिनु हुँदैन भन्ने होइन । बीआरआई लिँदा पनि नेपाल त सोभरेन्ट कन्ट्री (सार्वभौम राष्ट्र) हो नि । कुन प्रोजेक्टमा हामी अनुदान लिनसक्छौं, कुन प्रोजेक्टमा हामी लोन लिनसक्छौं त्यो नेगोशिएशनमा भर पर्छ । कुन प्रोजेक्टमा लोन लिँदा पनि सबभन्दा सस्तोमा लोन लिन्छौं, नेगोशिएशनमा भर पर्छ । त्यसकारण नेपालले आफ्नो राष्ट्रिय हितलाई सर्वोपरी राखेर छिमेकीहरूसँग, विदेशहरूसँग सम्बन्ध राख्नु पर्छ । र बीआरआईबाट हामीले लोन चाहिँ लिनै हुँदैन भन्ने खालको जुन कुराहरू आएको छ, यो पूर्वागहपूर्ण कुराहरू मात्रै हो ।”
