काठमाडौं । नेकपा माओवादी केन्द्रका अध्यक्ष पुष्पकमल दाहालले आफूहरु सरकार ढाल्ने खेलमा नलाग्ने बताउनु भएको छ ।
माओवादी केन्द्रले आज राजधानीमा गरेको खबरदारी सभालाई सम्बोधन गर्दै अध्यक्ष दाहालले सरकार ढल्ने डरले अझै बढी बेथितितिर नजान सत्ता गठबन्धन दललाई सचेत गराउनुभयो ।
माओवादीले आन्दोलनको घोषणा गर्नेबित्तिकै सत्ता गठबन्धन दलहरुले सडकबाट सत्ता परिवर्तन गर्न खोजिएको भनेर होहल्ला गरेको टिप्पणी गर्दै उहाँले खबरदारी सभा सरकार ढाल्नका लागि नभई गणतन्त्रको रक्षाका लागि भएको स्पष्ट पार्नुभयो ।
उहाँले विगतमा कांग्रेस, एमालेसँग सहकार्य गल्ती गरेको भनेर आफूहरुले गम्भीर आत्मसमीक्षा गरेको उल्लेख गर्दै अब समीकरण गरौं, प्रधानमन्त्री-मन्त्री बनाइदिनुस् भनेर नआउने बताउनुभयो ।
एमाले र कांग्रेसको प्रवृत्ति आफुहरुलाई सरेको भन्दै उहाँले भन्नुभयो- हामीमा पनि सर्यो माओवादीलाई चिन्ता के लागेको छ भने तपाईँहरु जस्तो दलाल र भ्रष्टाचारीको प्रतिनिधिको रुपमा हुनुहुन्छ, हामीले तपाईँहरुसँग गठबन्धन गरेर हामीले गल्ती गर्यौं, तपाईँहरुसँग समिकरण गर्नु गल्ति थियो, तपाईँहरुको प्रवृत्ति हामीमा पनि सर्यो । प्रतिक्रियावादी सँग हिँड्दा हामी पनि बिग्रिन थालेका थियौं । यसबारेमा हामीले गम्भीर आत्मसमिक्षा गरेका छौं ।
उहाँले संविधान संशोधन कांग्रेस-एमालेको बहाना भएको तर, मुख्य उद्धेश्य भ्रष्टाचारीलाई बचाउनु रहेको बताउनुभयो । उहाँले अब २०८४ को चुनाव एक्लै लड्ने पनि उल्लेख गर्नुभयो ।
खबरदारी सभामा माओवादी उपाध्यक्ष नारायणकाजी श्रेष्ठले सरकारले कानुनी शासनको धज्जी उडाएको बताउनुभयो । भ्रष्टाचारविरुद्धको कारबाही कानुनसम्मत रुपमा अघि बढोस् र अनुसन्धान निष्पक्ष होस् भन्ने दबाब दिन खबरदारी सभा गरिएको उहाँले बताउनुभयो ।