काठमाडौं । नेकपा एमालेले पार्टी कार्यालय भवन र जग्गा प्राप्तिको संस्थागत निर्णय विपरीत अभिव्यक्ति दिएको भन्दै तीन जना नेतालाई सात दिनभित्र स्पष्टीकरण पेस गर्न पत्र पठाएको छ ।
एमाले महासचिव शंकर पोखरेलले स्थायी समिति सदस्य विन्दा पाण्डे, नेता भीम रावल र उषाकिरण तिम्सेनालाई पार्टी निर्णयविपरित अभिव्यक्ति दिएकोमा किन कारबाही नगर्ने भन्दै स्पष्टीकरण दिन पत्र पठाउनुभएको हो ।
पत्रमा पार्टी अध्यक्षबाटै शिलान्यास गरिएको कार्यालय भवनको विषयमा सामाजिक सञ्जालबाट गरिएको गलत प्रचारले पार्टीको प्रतिष्ठा र मर्यादामा आँच पुर्याउने देखिएकाले सचिवालयको बैठकको निर्णयअनुसार स्पष्टीकरण सोधिएको उल्लेख छ ।
यसअघि आइतबार बसेको एमाले सचिवालयले बैठकले तीन नेतालाई स्पष्टीकरण सोध्ने निर्णय गरेको थियो । आज पठाइएको पत्र नेताहरूले प्राप्त गरिसकेका छन् ।
