काठमाडौं । विपक्षी दलहरुले सरकारले जनसरोकारका मुद्दामा चासो नदिएको भन्दै प्रतिनिधिसभाको विशेष अधिवेशन बोलाउन माग गर्नेबारे छलफल गरेका छन् ।
संघीय संसद् भवन नयाँ बानेश्वरमा बसेको विपक्षी दलहरुको बैठकले सुरुमा सरकारलाई ज्ञापनपत्र बुझाउने र त्यसपछि पनि आफ्ना माग सम्बोधन नगरेमा विशेष अधिवेशन माग गर्ने निष्कर्ष निकालेको हो । आफूहरुले उठाएका जनसरोकारका मुद्दामा सरकार गम्भीर नदेखिएको विपक्षी दलहरुको आरोप छ ।
विपद्को पूर्वसूचना हुँदाहुँदै पनि सरकारले पूर्वतयारी नगरेको र उद्धार, राहत र पुनःस्थापनामा ध्यान नदिएको विपक्षीको आरोप छ ।
यस्तै, सरकारले दल फुटाउन अध्यादेश ल्याउने तयारी गरेको आशंका पनि विपक्षी दलहरुले गरेका छन् । यस विषयमा सरकार, सभामुख र राष्ट्रपति समेतको ध्यानाकर्षण गराउने उनीहरुले जनाएका छन् । नेकपा माओवादी केन्द्रका अध्यक्ष पुष्पकमल दाहालले समसामयिक विषयमा छलफल गर्न भन्दै आज विपक्षी दलहरुको बैठक बोलाउनु भएको हो ।
बैठकमा रास्वपा, राप्रपा, एकीकृत समाजवादी, जसपा र आम जनता पार्टीका नेता सहभागी थिए । सरकारमा सहभागी महन्थ ठाकुर नेतृत्वको लोकतान्त्रिक समाजवादी पार्टी पनि विपक्षी दलको बैठकमा सहभागी थियो ।