राैतहट । रौतहटको माधवनारायण नगरपालिका-६ माधोपुरकी रुबीकुमारी साहको हत्या आरोपका आरोपी लक्ष्मण पासवानको उपचारका क्रममा मृत्यु भएको छ ।
शरीरमा आगोलाएर आत्मदाहको प्रयास गरेका पासवानलाई रौतहट प्रहरीले बुधबार बिहान उद्धार गरी उपचारका लागि काठमाडौं कीर्तिपुरस्थित बर्न अस्पताल पठाएको थियो ।
पासवानको उपचारका क्रममा मृत्यु भएको जिल्ला प्रहरी कार्यालय रौतहटका प्रवक्ता राजु कार्कीले जानकारी दिनुभयो ।
पसवान सुटकेसभित्र शव भेटिएकी रुबीकुमारी साहको हत्या प्रकरणका मुख्य अभियुक्त भएको प्रहरीको भनाइ छ । रुबीको हत्या गरेर फरार भएका पासवानले बुधबार पाँचौं दिन आफ्नै गाउँमा पुगेर जिउमा पेट्रोल खन्याएर आत्मदाह गर्ने प्रयास गरेका थिए ।
जिल्ला प्रहरी कार्यालय रौतहटका प्रवक्ता राजु कार्कीको नेतृत्वमा खटिएको प्रहरी टोलीले पासवानलाई उद्धार गरी गरुडास्थित बेटर नेपाल अस्पतालमा पुर्याएको थियो ।
रुबी र लक्ष्मण पूर्व प्रेमी-प्रेमिका भएको पाइएको प्रहरीले जनाएको छ। गत शनिबार रौतहटको गौर–गंगापिपरा सडक खण्डको मुडव लवा मोड नजिक सुटकेशमा महिलाको शव फेला परेको थियो ।
सुटकेसमा डोरीले बाँधिएको अवस्थामा भेटिएको शव रौटहटको माधवनारायण नगरपालिका- ६ मधोपुर माइती भएकी रुबीकुमारी साहको रहेको थियो ।
