महोत्तरी । गुठी संस्थानले महोत्तरीको लक्ष्मी नारायण मठ मठिहानी स्थानको उत्तराधिकारी महन्थका रूपमा डा. रविन्द्र दास बैष्णवलाई नियुक्त गरेको छ । गुठी संस्थानको समितिको बैठक निर्णयअनुसार डा. दासलाई मठिहानी स्थानको महन्थको रूपमा नियुक्त गरिएको हो ।
लामो समयदेखि विवादमा रहेको नियुक्ति गुठी संस्थानले फागुन २८ गते जारी गरेको पत्रका अनुसार मठिहानी स्थानको उत्तराधिकारी नियुक्तिका लागि परेको निवेदनको आधारमा समितिको बैठक नं ४ सयको निर्णयअनुसार डा. दासलाई निर्देशिका २०७७ को दफा १० बमोजिम महन्थको पदमा नियुक्ति प्रदान हो ।
मठाधिश मान महन्त जगरनाथ दास बैष्णवलाई माथि जग्गा जमिन सम्बन्धि मुद्दा सर्बोच्च अदालतमा विचाराधिन हुँदा मठमा महन्तको पद रिक्त रहँदै आएको थियो । डा. रविन्द्र दास बैष्णवको नियुक्तिले मठको परम्परालाई नयाँ दिशामा लैजाने र समुदायमा आध्यात्मिक उत्थानका लागि नयाँ कार्यहरू शुरू गर्ने आशा गरिएको छ ।
लक्ष्मी नारायण मठ मटिहानीलाई नेपालका मठहरूको सर्वोच्च मानिन्छ । यस मठको इतिहास र सांस्कृतिक महत्व गहिरो छ । त्यहाँको महन्थ पद परम्परागत रूपमा एक उच्च सम्मानको पदको रूपमा लिइन्छ ।
यसले समाजमा आध्यात्मिक र सांस्कृतिक नेतृत्व प्रदान गरेको छ । १ हजार ३ सय बिघा जग्गा रहेको मठ महन्त नहुदा पुजाअर्चना र दैनिक क्रियाकलापमा समस्या हुँदै आएको छ भने जग्गा अतिक्रमणमा परिरहेको छ ।
