काठमाडौं । नयाँ वर्षको उपलक्ष्यमा सर्वसाधारणहरू बिहानैदेखि मठमन्दिर दर्शन गर्न पुगेका छन् ।
काठमाडौंसहित देशका विभिन्न मन्दिरमा दर्शनार्थीहरूको भीड लागेको छ । वर्षको पहिलो दिन काठमाडौंको पशुपतिनाथ, कोटेश्वर महादेव, मैतीदेवी, राम मन्दिर, सपनातीर्थलगायत स्थानमा धेरै भक्तजनहरू देखिन्छन् ।
यस्तै पाल्पाको भैरवनाथ मन्दिर, बागलुङको कालिका, दाङको अम्बिकेश्वरी मन्दिर, जनकपुरको जानकी मन्दिरलगायत अधिकांश मठमन्दिरमा पूजा आराधनाका लागि दर्शनार्थीहरू पुगेका छन् । नयाँ वर्षको दिन विभिन्न समुदाय तथा क्षेत्रविशेष चाड पर्ने भएकाले पनि यो दिनको धार्मिक तथा सांस्कृतिक महत्त्वसमेत रहने गरेको छ ।
मंगलबार सुदूरपश्चिममा बिसु पर्व मनाइँदै छ । वर्षभरि देशविदेशमा रहेका आफन्त एकदिन भए पनि घर फर्कनैपर्ने मान्यताका कारण यतिबेला सुदूरपश्चिमका गाउँबस्तीमा चहलपहल र उत्साह बढेको छ । यसैगरी नयाँ वर्षको अवसरमा भक्तपुर जिल्ला जात्रामय बनेको छ । मध्यपुर थिमिमा प्रसिद्ध बिस्का जात्राको रौनक छ ।
अन्य ठाउँमा पनि स्थानीय जात्रा चलिरहेको छ । बिस्काको पाँचौँ दिन अर्थात् नयाँ वर्षमा अघिल्लो दिन उभ्याइएको लिंगो ढालिने गरिन्छ । बिस्काको जात्रा हेर्नाले सुख, समृद्धि, सहकाल आउनुका साथै शत्रु नास हुन्छ भन्ने धार्मिक जनविश्वास छ।
