काठमाडौँ । सरकारले ६३ जना उपसचिवलाई सरुवा तथा कामकाजमा खटाउने निर्णय गरेको छ । संघीय मामिला तथा सामान्य प्रशासन मन्त्रालयले सोमबार विभिन्न स्थानीय तह र एक जिल्ला समन्वय समितिमा कर्मचारी व्यवस्थापनको निर्णय गरेको हो ।
मन्त्रालयका अनुसार सरुवा गरिएकामध्ये केही उपसचिवलाई नियमित स्थानान्तरण र अधिकांशलाई स्थानीय तहमा कामकाजका लागि खटाइएको हो । विशेषगरी लामो समयदेखि प्रमुख प्रशासकीय अधिकृतविहीन रहेका स्थानीय तहमा कर्मचारी पठाइएको छ । त्यसैगरी, निमित्तको भरमा सञ्चालन भइरहेका पालिकाहरूमा पनि दरबन्दीअनुसार उपसचिव खटाइएको हो । यस कदमले प्रशासनिक कामकाजलाई व्यवस्थित बनाउनुका साथै स्थानीय तहमा थप प्रभावकारी, छरितो र सहज सेवा प्रवाह हुने अपेक्षा गरिएको मन्त्रालयले जनाएको छ ।
मन्त्रालयका अनुसार आवश्यक जनशक्ति अभावका कारण कतिपय स्थानमा सेवा प्रवाह प्रभावित हुँदै आएको अवस्थामा कर्मचारी व्यवस्थापनले त्यस्ता समस्या समाधानमा सहयोग पुग्ने विश्वास लिइएको छ । यसले नागरिकले पाउने सेवा अझ सहज, छिटो र गुणस्तरीय हुने मन्त्रालयको दाबी छ ।
