काठमाडौं । प्रधानमन्त्री सुशीला कार्कीले आगामी फागुन २१ गते हुने प्रतिनिधि सभा निर्वाचनका लागि उत्साहजनक रूपमा मनोनयन दर्ता भएकोमा खुसी व्यक्त गर्दै मुलुकबाट अब अन्योल र अनिश्चितताको अवस्था पूर्णतः अन्त्य भएको बताउनुभएको छ ।
उम्मेदवारी मनोनयन प्रक्रिया सम्पन्न भएपछि एक विशेष सन्देश जारी गर्दै प्रधानमन्त्री कार्कीले यस कार्यलाई लोकतन्त्रको अर्को महत्त्वपूर्ण कोशेढुङ्गाका रूपमा चित्रण गर्नुभएको हो । प्रधानमन्त्रीले निर्धारित समयतालिकाभित्र मनोनयन दर्ता गराउने सबै राजनीतिक दल तथा उम्मेदवारहरूमा हार्दिक आभार प्रकट समेत गर्नुभयो ।
प्रतिनिधि सभाका १ सय ६५ पदका लागि ३ हजार ४ सयभन्दा बढी उम्मेदवारहरूले मनोनयन दर्ता गराउनुले लोकतान्त्रिक प्रणालीप्रति नेपाली जनताको प्रगाढ विश्वास रहेको पुष्टि भएको उहाँको भनाइ छ । प्रधानमन्त्री कार्कीले यो राष्ट्रिय उत्साहले नेपाली जनता लोकतन्त्रलाई सुदृढ बनाउन सचेत र सक्षम छन् भन्ने तथ्यलाई पुनः प्रमाणित गरेको उल्लेख गर्नुभएको छ ।
