विगतका कमजोरी दोहोरिन नदिने संकल्प गर्न विशेष महाधिवेशन गर्‍यौं : महामन्त्री शर्मा

काठमाडौं । नेपाली कांग्रेसका महामन्त्री विश्वप्रकाश शर्माले पार्टीले गरेका कमजोरी र पार्टीभित्र रहेका समस्याको समीक्षा गर्दै आगामी दिनमा त्यस्ता कमजोरी दोहोरिन नदिने संकल्प गर्न विशेष महाधिवेशन आयोजना गरिएको बताउनुभएको छ ।

काठमाडौंमा जारी पार्टीको दोस्रो विशेष महाधिवेशनको उद्घाटन सत्रलाई सम्बोधन गर्दै महान्त्री शर्माले यस्तो बताउनुभएको हो । उहाँले पुरानै ढंगले नयाँ यात्रा गर्न नसकिने उल्लेख गर्दै नयाँ सोच र संकल्प लिएर अघि बढ्नुपर्ने बताउनु भयो । उहाँले असन्तुष्टि, अस्थिरता र द्वन्द्वको पृष्ठभूमिमा पनि कांग्रेसको नेतृत्वमा मुलुकमा शिक्षा, स्वास्थ्य र पूर्वाधार विकासमा महत्वपूर्ण उपलब्धी भएको दाबी गर्नुभयो । 

उहाँले भदौ २३ र २४ गते भएका घटनालाई अलग-अलग रूपमा हेर्नुपर्ने भन्दै अब सद्भाव, सुशासन र समृद्धिको बाटोमा अघि बढ्न जरूरी रहेको बताउनु भयो । उहाँले प्रत्यक्ष अप्रत्यक्ष रूपमा मुलुकलाई सहयोग गरिरहने तर सधैं प्रताडना भोगिरहने वर्गलाई सम्मान गर्न महाधिवेशन आह्वान गरिएको बताउनु भयो ।