काठमाडौं । दलहरूले समानुपातिक सूची पहुँचवालाकै हालीमुहाली हुने गरी बनाएको भन्दै समानुपातिकै उम्मेद्वार र नेताहरूले असन्तुष्टि जनाएका छन् ।
कान्तिपुर टेलिभिजनको कार्यक्रम सरोकारमा कुरा गर्दै रास्वपाबाट समानुपातिक उम्मेद्वार बन्नुभएका अधिकारकर्मी मोहना अन्सारीले समानुपातिकको बन्दसूची हेर्दा सन्तुष्ट हुन नसकिने बताउनुभयो । ६४ सालको संविधानसभा निर्वाचनपछि समानुपतिक प्रतिनिधित्व त्यसको मर्मअनुरूप हुन नसकेको भन्दै उहाँले भन्नुभयो 'मैले केहीको देखेको छु, मलाई फेरि व्यक्तिगत प्रश्न गर्नुहोला म सन्तुष्ट हुन सकेको छैन, अहिले पनि धेरै राजनीतिक दलमा नचिनिएका व्यक्तिहरू तर अचानक आएको तर लामो राजनीतिक लगानी भएका व्यक्तित्वहरू पर्नु भएको छैन ।'
यस्तै कार्यक्रममा कांग्रेस नेता रामहरि खतिवडाले कांग्रेसबाट समानुपातिक सूचीमा खस आर्यको पहिलो नम्बरमा अर्जुननरसिंह केसीको नाम राखेकोमा असन्तुष्टि जनाउँदै उहाँलाई आफ्नो नाम फिर्ता लिन आग्रह गर्नुभयो । खतिवडाले भन्नुभयो "३६ सालदेखि निरन्तर चुनाव लड्नेले अब म चुनाव लड्दिनँ है भनेर घोषणा पनि गर्ने अनि समानुपातिकमा एक नम्बरमा राख्दिनुस् भनेर अलाप-विलाप गर्ने, यो राजनीति अब अन्त्य हुनुपर्छ । म त उहाँलाई सार्वजनिक रूपमा आग्रह गर्न चाहन्छु उहाँले आफ्नो नाम समानुपातिकबाट फिर्ता लिनुपर्छ ।”
यस्तै कार्यक्रमका सहभागी सामाजिक अभियन्ता सुमन सायमीले राजनीतिक रूझान नै नभएका व्यक्तिहरू समानुपातिकबाट छिर्न खोजेको तर उनीहरू केही काम गर्न नसक्ने दाबी गर्नुभयो । अहिले समानुपातिकमा देखिएका धेरै व्यक्ति पैसाको बलबुता वा नातावाद र कृपावादबाट आएको उहाँको भनाइ थियो । 'उनीहरूले साँच्चै देश बनाउँछन्, जनताले सोचिरहेका छन् समानुपातिकमा गएपछि संसद्मा के बोल्लान्, के गर्लान् ? सायमीको प्रश्न थियो ।
कार्यक्रम सरोकार बुधबार राति १० बजे कान्तिपुर टेलिभिजनमा प्रसारण हुनेछ भने कान्तिपुर टेलिभिजनको युट्युब च्यानलमा ९ बजे हेर्नसक्नु हुनेछ ।
.png&w=400&height=300)
