काठमाडौं । काठमाडौंको नारायणचौरस्थित नन्दीकेशरी बगैंचामा खुसी चिल्ड्रेन पार्कको उद्घाटन गरिएको छ ।
काठमाडौँमा शनिबार एक कार्यक्रम गरी पार्क उद्घाटन गरिएको हो । पार्कको वास्तुकलाको डिजाइन गाथा आर्किटेक्चर्सले गरेको छ । गाथाकी निर्देशक श्रृंखला खतिवडाले जीर्ण अवस्थामा रहेको ठाँउलाई प्रयोग गरेर पार्क निर्माण गर्नु चुनौतीपूर्ण रहे पनि अवसरको रूपमा लिएको बताउनुभयो । पार्क निर्माणपछि बालबालिकालाई खेल्नका लागि सुरक्षित स्थल बनेको खतिवडाको भनाइ छ ।
खुसी चिल्ड्रेन पार्क गुणस्तरीय सामग्री प्रयोग गरेर निर्माण गरिएकाले बालबालिकाहरू सुरक्षित रहने गाथाका आर्किटेक्ट सुभम कोइरालाको भनाइ छ । पार्क निमार्णका लागि आवश्यक सामग्री नेपालमा उपलब्ध नभएपछि विदेशबाट समेत ल्याइएको महाराजा रोयल क्यासिनोका प्रशासकीय प्रमुख सुभानवित गुरुङले जानकारी दिनुभयो । पार्कको उद्घाटन नेपाली कांग्रेसका महामन्त्री गगन थापाले गर्नुभएको हो ।
