नेपाली कम्युनिष्ट पार्टीले सडकमा एकता सभा गरेपछि पोखराका स्थानीय व्यवसायीद्वारा विरोध

पोखरा । पोखरामा नेपाली कम्युनिष्ट पार्टी-नेकपाले सडकमा एकता सभा गरेपछि स्थानीय व्यवसायी विरोधमा उत्रिएका छन् ।

आइतबार पोखराको मानव अधिकार चोकमा नेकपाद्वारा एकता सभाको आयोजना गरिएपछि व्यवसाय ठप्प भएको, ग्राहक आवतजावत र यातायात अवागमनमा असर परेको र सुरक्षा वातावरणसमेत कमजोर हुने भन्दै व्यवसायीले विरोध उत्रिएका हुन् । उनीहरूले गरि खान देऊ, व्यवसाय चल्न देऊलगायतका प्लेकार्डसहित नाराबाजी गर्दै विरोध जनाएका थिए । 

व्यवसायीले विरोध गर्दा कार्यकर्ता र व्यवसायीबीच केहीबेर धकेलाधकेलसमेत भएको थियो । विरोधका बीच पनि कार्यक्रम गरेपछि व्यवसायीहरूले पसल बन्द गरेर प्रमुख जिल्ला अधिकारीसमक्ष ज्ञापनपत्र बुझाएका छन् । चिप्लेढुंगादेखि सिद्धार्थचोकसम्मको सडकमा विभिन्न राजनितिक दल, संघसंगठनलाई सभा सम्मेलन गर्न पोखरा महानगरले अनुमति दिने गरेको भन्दै असन्तुष्ट व्यवसायीले केहि वर्ष यता विरोध जनाउँदै आएका छन् । 

कार्यक्रम अघि विरोध भएपछि पोखराको मानव अधिकार चोक र आसपासका सडक क्षेत्रमा प्रहरी सुरक्षा बढाइएको छ । नेकपाको एकता घोषणा सभामा आइतबार पार्टी संयोजक पुष्पकमल दाहाल, माधवकुमार नेपाल लगायतका शीर्ष नेताले सम्बोधन गर्ने कार्यक्रम छ ।