काठमाडौं । नेकपा एमाले अध्यक्ष एवं पूर्वप्रधानमन्त्री केपी शर्मा ओलीले आगामी महाधिवेशनमा मतदान गर्न चाहनेहरूका लागि मतदानबाटै पदाधिकारी चयन हुने बताउनुभएको छ ।
आइतबार दिउँसो पार्टी केन्द्रीय कार्यालय च्यासलमा एघारौँ राष्ट्रिय महाधिवेशनको प्रतिक चिन्ह (लोगो) सार्वजनिक गर्दै अध्यक्ष ओलीले यस्तो बताउनुभएको हो । महाधिवेशनमा संगठनात्मक विषय, राजनीतिक प्रतिवेदनमा कुनै हेरफेर गरिराख्नुपर्ने अवस्था नरहेको बताउनु भयो ।
विधानमा ठूलो परिवर्तन गर्नुपर्ने केही नरहेको भए पनि आवश्यक परे केही छोटो विधिबाट गर्न सकिने उहाँले स्पष्ट पार्नुभयो । उन्नत सहमतिका साथ महाधिवेशनलाई एकताको महाधिवेशनको रूपमा अघि बढाउन उहाँको आह्वान छ । महाधिवेशन पुनःगठन, पुनः संरचना, रूपान्तरण, पुस्तान्तरणको थलो भएको बताउँदै सकेसम्म सहमतिका आधारमा पदाधिकारी टुंग्याउन आग्रह गर्नुभयो ।
सर्वसम्मति हुन नसके मतदान अनिवार्य हुने पनि उहाँले स्पष्ट पार्नुभयो । एकताबद्ध भएर महाधिवेशनमा जान र कसैलाई अपमान नगर्न उहाँको आग्रह छ । अध्यक्ष ओलीले प्रतिस्पर्धालाई एमालेले नराम्रो नमान्ने पनि स्पष्ट पार्नुभयो । आफूहरूले रोजेर नै प्रतिस्पर्धाको तरिका ल्याएको उहाँले बताउनु भयो ।
