काठमाडौं । कृषि तथा पशुपन्छी विकासमन्त्री डा. मदनप्रसाद परियारले जलवायु परिवर्तनसम्बन्धी संयुक्त राष्ट्रसंघका पक्ष राष्ट्रको सम्मेलनको ३०औँ श्रृङ्खला (कोप-३०)मार्फत हिमालको एजेन्डा विश्वव्यापी रूपमा स्थापित गर्न सफल भएको बताउनुभएको छ ।
आइतबार राष्ट्रिय सभाको विकास, आर्थिक मामिला तथा सुशासन समितिको बैठकमा बोल्दै मन्त्री परियारले सो दाबी गर्नुभएको हो । उहाँले कोप-३० मा नेपालको सहभागिता विगतको तुलनामा थप सफल र प्रभावकारी भएको दाबी गर्नुभयो । उहाँले सम्मेलनमा हिमालको एजेन्डा उठाउँदै हिमाल संरक्षणको मुद्दालाई छुट्टै मुद्दाको रूपमा स्थापित गर्न सफल भएको पनि बताउनु भयो ।
नेपालले उठाएको हिमालको मुद्दालाई अन्य साना तथा टापु राष्ट्रहरूले समेत समर्थन दिएको उहाँले बताउनु भयो । उहाँले हानि नोक्सानी कोषका कार्यकारी निर्देशकसमक्ष नेपाललाई क्षतिपूर्ति दिने सन्दर्भमा प्राथमिकतामा राख्न आग्रह गरेको उल्लेख पनि गर्नुभयो ।
उहाँले मुलुकको वर्तमान राजनीतिक कठिनाइका बीच कोपमा नेपालको सफल र प्रभावकारी सहभागिता रहेको बताउनु भयो ।
.png&w=400&height=300)
