काठमाडौं । गैरआवासीय नेपाली संघको विवाद अन्त्य गर्न आइतबार १० बुँदे सहमतिपत्रमा हस्ताक्षर भएको छ ।
प्रधानमन्त्री सुशीला कार्कीको उपस्थितिमा महेश श्रेष्ठ र बद्री केसीले एकतासम्बन्धी सहमति पत्रमा हस्ताक्षर गरेका हुन् । दुवै पक्षबीच आगामी वैशाख ४ गतेसम्म १२औं महाधिवेशन गर्ने सहमति भएको छ । संघको अलग-अलग समूहको नेतृत्व गरेका बद्री केसी र महेशकुमार श्रेष्ठ पक्षले विवादलाई थाँती राखेर एकले अर्कालाई स्वीकार गर्न राजी भएका हुन् ।
केसी नेतृत्वको कार्यसमिति श्रेष्ठको नेतृत्वमा एकता महाधिवेशनमा जान तयार भएको हो । सहमतिपत्रमा हस्ताक्षर गर्दै केसी र श्रेष्ठले एनआरएनएलाई पुनः एकीकृत, स्वायत्त, गैरराजनीतिक र विश्वभर छरिएका नेपाली समाजको साझा संस्थाका रूपमा अघि बढाउने प्रतिबद्धता जनाएका छन् ।
कार्यक्रममा प्रधानमन्त्री सुशीला कार्कीले आइतबारको सहमति गैरआवासीय नेपाली संघको एकताको कोशेढुंगा भएको बताउनुभयो । उहाँले एनआरएनएले एकताको सन्देश दिएको बताउनु भयो । सो अवसरका एनआरएनका प्रतिनिधिहरूले विदेशमा रहेका नेपालीहरूका लागि प्रतिनिधि सभाको चुनावमा मताधिकारको व्यवस्था गर्न सुझाएका थिए ।
