सिरहा । सिरहाको कल्याणपुर नगरपालिकाका तत्कालीन मेयर रामपुकार साह एक लाख र"पैयाँ घुससहित रंगेहात पक्राउ परेको घटनाको पीडित नै 'होस्टाइल' भएको पाइएको छ ।
उजुरीकर्ता जसोधा कुमारीले विशेष अदालतमा बकपत्रमा बयान फेरेको पाइएको हो । कल्याणपुर नगरपालिका-६ स्थित भोक्राहामा २० लाख बजेटमा निर्माण भएको नालाका उपभोक्ता समितिसँग तत्कालीन मेयर साहले २० प्रतिशत कमिसन मागेका थिए । तर, उपभोक्ता समितिले रकम दिन नसकेपछि मेयर साहले योजनाको चेक दिन मानेनन् ।
एक साताको बार्गेनिङपछि मेयर साहले चेक लिनुअघि कम्तिमा एक लाख रूपैयाँ दिनुपर्ने अड्डी कसेपछि उपभोक्ता समितिले अख्तियार दुरूपयोग अनुसन्धान आयोग, बर्दिबासमा उजुरी दियाे । जसोधा यसै उपभोक्ता समितिका अध्यक्ष हुन् ।अख्तियारमा जसोधा र उपभोक्ता समितिले निर्णय नै गरी काम गर्ने जिम्मेवारी दिएका स्थानीय कुशेश्वर साहले संयुक्त रूपमा दिएको उजुरीपछि अख्तियारको टोलीले साहलाई असार ३२ मा घुस लिइसकेको अवस्थामा कार्यालयबाटै पक्राउ गरेको थियो ।
मेयर साह पक्राउ परेपछि अनुसन्धानका क्रममा साउन १४ मा जसोधाले अख्तियार समक्ष भनेकी छिन्, 'नालाको काम सम्पन्न भएपछि भुक्तानी माग्न जाँदा मेयर साहले अहिले कम्तिमा एक लाख रूपैयाँ दिनुपर्ने, नत्र चेक नदिने भनेर डर त्रास देखाएपछि अख्तियारमा उजुरी दिँदै उनलाई घुस रकम दिएका हौं ।'
उनी अख्तियारमा बयान दिन जाँदा कुशेश्वरकी पत्नी किरणकुमारी साह पनि सँगै गएकी थिइन् । अख्तियारले सकभर बयान दिने व्यक्तिबाटै बयान लेख्न पनि लगाउँछ । जसोधाले भने आफूलाई लेख्न गाह्रो हुने बताएपछि अख्तियारले जसोधाकै लिखित सहमतिमा उनले बोल्ने कुरा किरणलाई लेख्न लगाएको थियो ।
तर, उनै जसोधाले आफैंले अख्तियारमा दिएको बयान फेर्दै गत कात्तिक ५ मा विशेष अदालतका अध्यक्ष न्यायाधीश सुदर्शनदेव भट्ट, न्यायाधीश नारायणप्रसाद पौडेल र न्यायाधीश बिदुर कोइरालाको संयुक्त इजलासमा बकपत्रका क्रममा आफूले अख्तियारमा उजुरी नदिएको र आफूले कागजमा सहीछाप गरे पनि केमा गरेको भन्ने कुरा थाहा नभएको बताएकी छिन् ।
बकपत्रका क्रममा विशेष सरकारी वकिलको कार्यालयको तर्फबाट सहायक न्यायाधीवक्ता सरिता पोखरेलले त्यसपछि कुनै कागजमा सहीछाप गर्दा पढेर, सुनेर र बुझेर सहीछाप गर्नुपर्छ भन्ने कुरा थाहा थियो वा थिएन ? भन्ने प्रश्न गर्दा जसोधाले 'थाहा थिएन' भन्ने जवाफ दिएकी छन् । झुठा बकपत्र गर्ने व्यक्तिलाई समेत सजाय हुने व्यवस्था रहेको कुरा थाहा थियो कि थिएन भन्ने प्रश्नमा पनि उनले 'थाहा नभएको' भनेकी छन् ।
यता, अर्का उजुरीकर्ता कुशेश्वले भने निलम्बित मेयर साहले आफू जोगिनका निम्ति जसोधालाई आर्थिक प्रलोभनमा पारी मानसिक रूपमा प्रताडित गरेर बयान फेर्न लगाएको आरोप लगाएका छन् । मेयर पक्षबाट आफूलाई पनि बयान फेर्न १५ लाखसम्म रूपैयाँ दिने प्रस्ताव आएको र नमान्दा आफू असुरक्षित भएर बस्नुपरेको उनले सुनाए ।
कुशेश्वरले मंसिर ७ मा काठमाडौंस्थित रिपोर्टर्स क्लबमा पत्रकार सम्मेलन नै गरी स्थानीय प्रहरी प्रशासनले पनि खासै सहयोग नगरेको गुनासो गरे । 'मेयरले विभिन्न मान्छेमार्फत सकभर प्रलोभनमा पार्ने प्रयास गरे, तर सफल नभएपछि मानसिक रूपमा गलाउने हर्कत गर्दै आएका छन्,' उनले भने, 'मेयरले म अदालतबाट सफाइ पाएर आउँछु भन्दै ठोकुवा गरिरहेका छन्, त्यसपछि कुशेलाई यस्तो गर्छु, त्यस्तो गर्छु भन्दै हिँडेका छन्, म डराएर बस्नुपर्ने अवस्था छ ।'
तर, निलम्बित मेयर साहले भने कोही उजुरीकर्तालाई बयान फेर्न आफूले कुनै किसिमको प्रभावमा नपारेको दाबी गरे । 'सुरूमा ती महिला अरुको उक्साहटमा परेर मलाई फसाउन खोजेकी थिइन्, तर पछि कुरा बुझेर बयान दिएकी हुन्,' उनले भने, 'कुशेश्वरलाई पनि कुनै दबाब वा धम्की दिएको छैन ।'
अख्तियारले अनुसन्धानपछि साहमाथि गत साउन २३ मा विशेष अदालतमा घुस रिसवत लिई भ्रष्टाचार गरेको सम्बन्धी मुद्दा दायर गरेको थियो । आयोगले साहलाई भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुरमा बिगो एक लाख र दफा ३ को उपदफा (१) को देहाय (ख) बमोजिम कैद माग दाबी गरेको छ ।
यो मुद्दा विशेष अदालतमा अझै विचाराधीन छ । पछिल्लोपल्ट मंसिर ३ मा मुद्दा पेसी चढेको थियो । तर, प्रतिवादी निलम्बित मेयरको कानून व्यवसायीले स्थगित गराएका थिए । विशेष अदालतका अनुसार, यही मंसिर १५ मा फेरि मुद्दा पेसी चढ्दैछ ।
