सिन्धुपाल्चोक । सिन्धुपाल्चोकको चौतारा-नवलपुर-मेलम्ची सडकखण्डअन्तर्गत झ्याडीदेखि पाटीगाँउ खण्ड निर्माणमा गुणस्तर कायम नगरेको खुलासा भएको छ ।
भण्डारी, गोल्मेश्वर र अमरज्योति जेभी कन्स्ट्रक्सनले ८ किलोमिटरको २२ करोड ८३ लाख रूपैयाँको लागतमा निर्माण सम्झौता गरेको सडकमा सम्झौता र प्राविधिक मापदण्डविपरीत निर्माण सामग्री प्रयोग गरिएको पाइएको हो । कहाँसम्म भने पुर्वाधार विकास कार्यलयले सडक निर्माण मापदण्डअनुसार काम नभएको ठहर गर्दै मंसिर ११ गते नै निर्माण रोक्न आधिकारिक पत्र पठाए पनि काम रोकिएको छैन ।
चौतारा-नवलपुर-मेलम्ची सडकखण्डमा गुणस्तरहीन सामग्री प्रयोग भएको भन्दै स्थानीयवासीले असन्तुष्टि जनाएका छन् । झ्याडी खोलादेखि नवलपुरसम्म भइरहेको सडक निर्माणका क्रममा मापदण्डअनुसारको सामग्री र गुणस्तर नअपनाइ काम भइरहेकोले स्थानीयले निर्माण कार्यप्रति असन्तृष्ट बनेका हुन् । सडकको ट्र्याक खुलेको ३२ वर्षपछि पक्की सडक सुधारमा गुणस्तरहीन सामाग्री देखिएपछि उनीहरू आक्रोशित बनेका छन् ।
सम्झौताअनुसार क्रसर मटेरियल अनिवार्य छ, तर त्यहाँ माटो र ठूला-ठूला ढुंगा प्रयोग गरिएको छ । काम गर्ने क्रममा गुणस्तरमा गल्ती भएको निर्माण कम्पनीले स्वीकार गरेका छन् । पुर्वाधार विकासको इन्जिनियरसँगकाे समन्वयमा गुणस्तरको परीक्षण गरी सुधार गरेर काम गर्न निर्माण कम्पनी सहमत भएको छ ।
पुर्वाधार विकास कार्यलयले सडक निर्माण मापदण्डअनुसार नभएको ठहर गर्दै मंसिर ११ गते नै निर्माण रोक्न आधिकारिक पत्र पठाइएको थियो । तर कार्यलयको पत्रलाई बेवास्ता गर्दै ठेकेदारले रातारात बेस बिछ्याउने काम निरन्तर अघि बढाएको छ । निर्माण कम्पनीले मापदण्डअनुसार काम नगरेको भन्दै स्थानीयको दबाबपछि पूर्वाधार विकास कार्यालय चुपचाप बसेको बेला ठेकेदारले रातारात माटो र ठूला ढुंगाले सडकको बेस तयार गरेको खुल्न आएको हो ।
आफूलाई जानकारी नभएको भन्दै पन्छिन खोज्ने पुर्वधार विकास कार्यालयको प्रविधिकको भनाइ अवलोकनसँग मेल खाएन । गुणस्तरहीन सामग्री प्रयोग भएको थाहा पाएपछि बागमती प्रदेशसभा सदस्य युवराज दुलालले स्वयं कार्यालयलाई जानकारी गराएपछि मात्र प्राविधिक टोली स्थलमा पुगेको हो ।
कार्यालयले ११ गते नै काम रोक्न पत्राचार गरे पनि ढुंगा फुटाउनेदेखि माटोसहितको सामग्री ढुवानीसम्मका गतिविधि निरन्तर चलिरहेकाले कार्यालयकै भूमिकामाथि प्रश्न उठेको छ । निर्माणको चरणमा निर्माण कम्पनीको लापरबाही र सम्बन्धित कार्यालयले गुणस्तरमा चासो नदिँदा कामको पुर्वाधार विकास कार्यालयमाथिको विश्वसनीयता माथि प्रश्न चिन्ह उठेको छ ।
