काठमाडौं । प्रधानमन्त्री सुशीला कार्कीले विदेशमा बस्ने नेपालीहरूलाई नेपालमा भएको सम्पत्ति बेचर नलैजान आग्रह गर्नुभएको छ ।
आइतबार आयोजित गैरआवासीय नेपाली संघको एकता घोषणा कार्यक्रममा उहाँले आफ्नो सम्पत्ति नेपालमा सुरक्षित राख्न आग्रह गर्नुभएको हो । गैरआवासीय नेपालीलाई सरकारले दोस्रो दर्जाको नागरिकको रूपमा नहेरेको बताउँदै उहाँले विदेशमा रहेका नेपालीको सम्पत्तिको सुरक्षा सरकारले गर्ने बताउनु भयो ।
उहाँले हाल विश्वभर बाहिरका मान्छेलाई बस्न नदिने खालको चलन चलेको उल्लेख गर्नुहुँदै नेपालमा एउटा कोठा मात्रै भए पनि सुरक्षित राख्न आग्रह गर्नुभयो । उहाँले सरकारले गैरआवासीय नेपालीहरूका समस्या विस्तारै सम्बोधन हुँदै जाने पनि बताउनु भयो । गैरआवासीय नेपालीहरूले विगतमा पनि सहयोग गरेको उल्लेख गर्नुहुँदै उहाँले आगामी दिनमा पनि लगानी गर्न आग्रह गर्नुभयो ।
उहाँले गैरआवासीय नेपाली संघको एकताले नेपालमा रहेका राजनितिक दलहरूलाई एकता गर्नुपर्ने सन्देश दिएको उल्लेख गर्नुभयो । नेपालमा राजनितिक दलहरूमा विभाजन देखिएको उल्लेख गर्नुहुँदै उहाँले विभाजनले कसैलाई पनि राम्रो नगर्ने बताउनु भयो ।
