काठमाडौं । औषधि व्यवसायीहरूले औषधि व्यवस्था विभागमा धर्ना दिएका छन् ।
आइतबार बिहान व्यवसायीहरूले विभागमा धर्ना दिएका हुन् । औषधि ऐन, २०३५ को दफा ११ को उपदफा ५ खारेज गर्न माग गर्दै प्रदर्शन गरेका हुन् । प्रदर्शनमा उत्रिएका व्यवसायीहरूले हातमा कालोपट्टी बाँधेर उक्त उपदफाको विरोध गरेका छन् । विरोध कार्यक्रममा बोल्दै नेपाल औषधि संघ, काठमाडौं जिल्ला शाखाका महासचिव शोभमान श्रेष्ठले औषधि ऐन, दफा ११ लाई संशोधन गर्दा औषधि व्यवसायीहरूलाई पलायन गर्न खोजिएको आरोप लगाउनु भयो ।
उक्त दफाको उपदफा ५ तत्काल खारेज गर्न माग गर्नुभयो । सरकारले मंसिर १७ गतेसम्म पनि आफूहरूका माग पूरा नगरे कठोर निर्णय लिएर आन्दोलनमा उत्रिने चेतावनी दिनुभयो । सेवाग्राहीको स्वास्थ्यलाई ख्याल गरेर अहिलेसम्म औषधि पसलहरू खोलिरहेको बताउँदै आइतबार दिनको एक घन्टा, सोमबार दुई घन्टा गर्दै क्रमशः १७ गतेसम्म एक घन्टा बढाएर पसल बन्द गर्ने चेतावनी दिनुभयो ।
केही समय यता औषधि व्यवसायीहरूले आफ्नो मागहरू पूरा गर्न माग गर्दै धर्ना दिइरहेका छन् ।
