सुनसरी । एन्टिमाइक्रोबियल रेसिस्टेन्स -एएमआर) को बढ्दो जोखिमलाई ध्यानमा राख्दै काठमाण्डौ उपत्यका बाहिर पहिलोपटक धरानमा राष्ट्रिय कार्यशाला आयोजना भएको छ ।
अहिले नै कार्य गर्नुहोस् हाम्रो वर्तमान सुरक्षित गर्नुहोस्, हाम्रो भविष्य सुरक्षित गर्नुहोस् भन्ने मुख्य विषयसहित आयोजित कार्यक्रममा राष्ट्रिय र अन्तर्राष्ट्रिय संस्थाहरूका विशेषज्ञहरूको उल्लेखनीय सहभागिता रहृयो ।
त्यसअवसरमा एन्टिबायोटिक प्रयोगको सचेत रहन सरोकारवाला सबैलाई आग्रह गरिएको छ । बीपी कोइराला स्वास्थ्य बिज्ञान प्रतिष्ठान अन्तर्गतको फिजिसियन्स फर सोसल रेस्पोन्सिबिलिटी नेपालले प्रतिष्ठानकै माइक्रोबायोलोजी विभाग र औषधि विज्ञान विभागसागको सहकार्यमा आयोजित कार्यक्रममा बिपी प्रतिष्ठान, बिश्व स्वास्थ्य संगठन, स्वास्थ्य तथा जनसंख्या मन्त्रालय, नेपाल फ्लेमिङ कोष, तथा राष्ट्रिय स्तरका विज्ञहरूको उपस्थितिमा विशेषज्ञ प्रस्तुतीकरण, समुहगत छलफल तथा अन्तरक्रियात्मक सत्रहरू सञ्चालन गरिएको थियो ।
विशेष वक्ताहरूले एएमआरलाई विश्वव्यापी जनस्वास्थ्यका लागि तीव्र गम्भीर चुनौतीका रूपमा प्रस्तुत गर्दै तत्काल सम्भावित कदम चाल्न आवश्यक भएको निष्कर्ष निकालेका छन् । कार्यक्रममा नेपालमा एएमआरको अवस्था, चिकित्सा शिक्षा तथा स्वास्थ्य संस्थाहरूको भूमिका, एन्टिबायोटिकको दुरुपयोगका कारणहरू र नियन्त्रणका उपायबारे अद्यावधिक जानकारी सार्वजनिक गरिएको थियो ।
कार्यक्रममा सहभागी बिज्ञहरुले एएमआर नियन्त्रणका लागि उत्तरदायी एन्टिबायोटिक प्रयोग, जनचेतना विस्तार, अनुगमन प्रणाली सुदृढीकरण, तथा बहु-क्षेत्रीय सहकार्य अपरिहार्य रहेकोमा जोड दिए ।
