काठमाडौं । त्रिभुवन अन्तराष्ट्रिय विमानस्थलको धावनमार्गमा बिजुली सर्ट हुँदा उडान र अवतरण प्रभावित भएको छ ।
शनिबार बेलुकी करिब ५ बजेर २५ मिनेटपछि त्रिभुवन अन्तर्राष्ट्रिय विमानस्थलको धावनमार्गमा अचानक बिजुली सर्ट हुँदा सम्पूर्ण उडान गतिविधि प्रभावित भएका हुन् । लगातारको वर्षाका कारण धावनमार्गमा पानी पसेर विद्युत् सर्ट भएको अनुमान गरिएको छ ।
इलेक्ट्रिकल विभागका कर्मचारीहरूले के कारण बत्ति सर्ट भएको हो भन्ने पत्ता लगाउने प्रयास जारी राखेका छन् । प्रारम्भिक जानकारीअनुसार धावनमार्गको किनारामा रहेको ‘एज लाइट’ सर्ट भएको पाइएको छ । बिजुली सर्ट भएपछि दुबईबाट आएको फ्लाई दुबई, दोहाबाट आएको कतार एयरवेज र दिल्लीबाट आएको नेपाल एयरलाइन्सको जहाजहरूलाई सिमरामाथिको आकाशमा होल्डमा राखिएको छ ।
सिओलबाट आएको कोरियन एयरको विमान भने नयाँदिल्ली गएको छ । त्यस्तै, आन्तरिकतर्फ जनकपुरबाट आएको बुद्ध एयरको एटीआर केही समय होल्डमा रहेकोमा जनकपुर नै फर्किएको छ । यद्यपि, काठमाडौंबाट उडान नहुँदा विमानस्थलमा यात्रुहरूको चाप बढेको छ ।
त्रिभुवन विमानस्थलको धावनमार्ग करिब ३३ सय ५० मिटर लामो छ । हाल धावनमार्ग अँध्यारो बनेको छ र मर्मत कार्य तीव्र रूपमा भइरहेको विमानस्थलले जनाएको छ ।
