काठमाडौं । जेन-जी आन्दोलनका क्रममा ज्यान गुमाएका शहीद परिवारले सरकारसँग रोजगारी, निःशुल्क शिक्षा र उपचारको माग गरेका छन् ।
शुक्रबार सिंहदरबारमा गृहमन्त्री ओमप्रकाश अर्यालसँग भेटेर जेन-जी परिवारका सदस्यहरूले यस्तो माग राखेका हुन् । जेन-जी आन्दोलनका शहीदहरूको तस्बिर राजपत्रमा प्रकाशन गर्नुपर्ने पनि उनीहरूको माग छ । गृहमन्त्रीसँगको भेटपछि एकजना शहीदका आफन्तले शहीदका परिवारलाई निःशुल्क शिक्षा र स्वास्थ्य तथा रोजगारी उपलब्ध गराउनुपर्ने बताउनु भयो । शहीदहरूको शालिक निर्माण गर्नुपर्ने पनि उहाँको माग छ ।
उहाँले भन्नुभयो, ‘अब हामी शहीद परिवारको माग के छ भने रोजगारी, शिक्षा, स्वास्थ्यको प्रबन्ध गरियोस् । सरकारसँग हामीले यही माग गरिरहेका छौं । आश्वासन त सरकारको तर्फबाट सबैले राम्रै दिइरहनुभएको छ । तर हुने कहिले हो ? जेन-जी आन्दोलनका शहीदहर"को नाम राजपत्रमा निकाल्नुपर्यो । शहीदहरूको शालिकहरू निर्माण गर्नुपर्यो ।’
उहाँहरूले सरकारले जेन-जीका मागअनुसार भ्रष्टाचारको अन्त्य गर्नुपर्ने पनि बताउनु भयो । २३ र २४ भदौमा भएको जेन-जी आन्दोलनका क्रममा देशभर ७२ जनाले ज्यान गुमाएका थिए भने २ हजार ३१६ जना घाइते भएका थिए ।
