काठमाडौं । अन्तरिम सरकारका प्रधानमन्त्री सुशीला कार्की जेन-जी घाइतेसँग भेट गर्नबाट पन्छिनुभएको छ ।
आइतबार पाँच बुँदे माग लिएर सिंहदरबारस्थित प्रधानमन्त्री तथा मन्त्रीपरिषद्को कार्यालय पुगेका जेन-जी आन्दोलनका क्रममा घाइतेहरूसँग समय व्यस्तता भन्दै प्रधानमन्त्री कार्कीले भेट गर्नबाट टाढिनुभएको हो ।
जेन-जीका घाइतेहरू बिहान ९ बजेदेखि प्रधानमन्त्री कार्कीलाई भेट्न सिंहदरबारमा पुगेका थिए । तर प्रधानमन्त्र्री कार्की बिहानैदेखि बालुवाटारबाट निस्किनु भएन । प्रधानमन्त्रीले भेट्न नआएपछि जेन-जी घाइतेहरू आक्रोशित भएका छन् ।
उनीहरूले भदौ २३ र २४ को गोली प्रहारको तत्काल न्यायिक कारवाही हुनुपर्ने माग आफूहरूको रहेको बताएका छन् । त्यस्तै उनीहरूले संवैधानिक सुधार र जनमत संग्रह, जेन-जी आन्दोलनको संरक्षण र कानूनी सुरक्षा, भ्रष्टाचारविरूद्ध शुन्य सहनशीलता तथा सम्पत्ति छानबिन, संवैधानिक अंगमा स्वच्छ नियुक्ति र विदेशी हस्तक्षेप रोक लगायतका माग आफूहरू रहेको बताएका छन् ।
साथै उनीहरूले पाँच दिनभित्र आफ्ना माग पूरा हुनुपर्ने अल्टिमेटम दिएका छन् । प्रधानमन्त्री कार्यालयमा जेन-जीका घाइतेहरू थप आक्रोशित भएपछि प्रधानमन्त्री कार्कीका मुख्य सल्लाहकार अजयभद्र खनालले प्रधानमन्त्रीले आइतबार बालुवाटारबाटै काम गरिरहनुभएको बताउनु भयो ।
प्रधानमन्त्रीको कार्य व्यस्तताका कारण भेट गर्नसक्ने अवस्था नरहेको उहाँले बताउनु भयो । गत भदौ २३ र २४ गते भएको जेन-जी पुस्ताको आन्दोलनका क्रममा दर्जन बढी घाइते भएका छन् । उनीहरूमध्ये केहीको उपचार जारी छ ।
