काठमाडौं । निर्वाचन आयोगले आगामी फागुन २१ मा हुने निर्वाचनका लागि तिहारअघि नै राजनीतिक दलहरूसँग छलफल गर्ने भएको छ ।
प्रधानमन्त्री सुशीला कार्कीसहित मन्त्रिपरिषद्का सदस्यहरूसँग मंगलबार भएको छलफलमा आयोगले निर्वाचनको वातावरण बनाउन तिहारअगाडि नै राजनीतिक दलहरूसँग छलफल गर्ने जानकारी दिएको हो । छलफलमा आयोगले निर्वाचनमा नागरिकको अधिकतम सहभागिता सुनिश्चित गर्न र निर्वाचनको वातावरण बनाउनसमेत सरकारलाई आग्रह गरेको थियो ।
सिंहदरबारस्थित प्रधानमन्त्री तथा मन्त्रिपरिषद् कार्यालयमा भएको छलफलमा आयोग अधिकारीहरूले अहिलेसम्म भएका गतिविधिबारे प्रधानमन्त्रीलाई ब्रिफिङ गरेका थिए । आयोगले सरकारले राजनीतिक वातावरण निर्माणदेखि सामग्री व्यवस्थापनसम्मको पाटोमा प्रतिबद्धता जनाएको जानकारी दिएको छ ।
निर्वाचन कार्यतालिका सार्वजनिक गरिसकेको आयोगले तयारीका विषयमा सरकारसाग छलफल गरेको हो । मंगलबार निर्वाचनका लागि आवश्यक सामग्री, बजेट, मतपेटिका, मौज्दात सामग्रीलगायतका विषयमा समेत छलफल भएको थियो । यसैगरी, धरान उपमहानगर प्रमुख हर्कराज राईले दल दर्ताका लागि दिएको निवेदनमा पनि कामकारवाही भइरहेको आयोगले जनाएको छ।
